Doutor Acacio Cardoso Amaral Re-Eleitu Prezidente IPB Ba Períudu 2021-2025

Dili, 21 Juñu 2021 (IPB) – Institutu Politékniku Betano liuhosi Konsellu Jerál IPB no estrutura tomak realiza “Eleisaun Presidente IPB períudu 2021 to’o 2025“ ba dahuluk nian ne’ebé ofisialmente hala’o iha resintu auditóriu Fakuldade Engeñaria, Siénsia no Teknolojia Hera-Dili,(21/06).

Liuhosi Prezidente Konsellu Jerál IPB nian, Doutor Rui Daniel de Carvalho deklara katak ba eleisaun Prezidente IPB nian, hanesan faze dahuluk hodi realiza eleisaun Prezidente IPB ba tinan ida ne’e, nafatin tau konfiansa ba kandidatu nai’n-2 ne’ebé kompete ba eleisaun ne’e ba periudu 2021 to’o 2025 hodi kontribui dezenvolvimentu ba institutu ida ne’e di’ak ba futuru.Iha eleisaun refere,kandidatu nain-2 kompete ba eleisaun Prezidente IPB nian mak hanesan kandidatu dahuluk Profesór Acacio Cardoso Amaral, Ph.D no kandidatu daruak Profesór Claudio Filipe Ximenes Belo, M.Sc. nomos iha sesaun aprezentasaun programa ba kandidatu na’in-2 ba mandatu tinan 5 tuir mai.

Iha prosesu rezultadu eleisaun dahuluk, votasaun hosi kompozisaun Konsellu Jerál IPB nian hamutuk na’in-12 ne’ebé hili kandidatu dahuluk Profesór Acácio Cardoso Amaral, Ph.D hetan totál votu ne’en (6) no kandidatu daruak Profesór Claudio Filipe Ximenes, M.Sc totál votu ne’en (6) ho totál votus ba Kandidatu na’in-2 hanesan (drow), nune’e hosi parte Konsellu Jerál IPB deside hodi halo votasaun ba daruak nian.

Aleinde ne’e, iha votasaun ba daruak nian rezultadu dahuluk profesór Acacio Cardoso Amaral, Ph.D ho votu hamutuk sia (9) no kandidatu daruak Profesór Filipe Ximenes, M.Sc. ho votu hamutuk tolu (3) no ikus-liu Kandidatu dahuluk Profesór Acácio sai hanesan eleitu ba prezidente IPB ba períudu 2021 to’o 2025.

Iha fatin hanesan, Ministru Ensinu Superiór Siénsia no Kultura Doutor Longuinhos dos Santos, MM, kongratula ba Prezidenti eleitu foun hodi lidera IPB, maibé nafatin husu Prezidente foun presiza hadia kualidade formasaun, nune’e bele prepara ba rekursus diak ba nasaun hodi kompete ba kampu traballu.

Iha kongresu ne’e, partisipa hosi Ministru Ensinu Superior no Kultura Doutor Longuinhos dos Santos, MM, Ministru Agrikultura no Peskas Doutor Pedro dos Reis, Presidente Komisaun Funsaun Públiku Doutor Faustino Cardoso Gomes, Reitór UNTL Profesór Doutor João Soares Martins, MPH, Ph.D, Reitor IOB Doutor Pedro Ximenes, Diretór Ezekutivu ANAAA Doutor Edmundu Viegas, Diretór ADN Renato M. Monteiro da Cruz, Diretora Ezekutiva Laboratóriu Nasionál Saúde Sra. Endang S. da Silva, Profesór Cancio Monteiro dekanu FEST-UNTL, Diretora Ezekutiva Fundu Dezelvolvimentu Kapital Umanu Sra. Leila C. dos Santos, Pe. Nivio Lebre, FdCC, Konsellu Jerál IPB, Estrutura IPB, Funsionarius, Dosentes no estudante IPB.

Mídia IPB