ESAZ-KPA REALIZA SERIMÓNIA JUDISIUM BA FINALISTA NA’IN-50
IPB-Betano, 07 Jullu 2022
Institutu Politékniku Betano (IPB) liu hosi Eskola Superiór Agronomia i Zootéknika, Kursu Produsaun Animal (ESAZ-KPA) realiza serimónia Judisium ba datoluk (III) nian, totál estudante sira partisipa iha judisium ne’e hamutuk 50 kompostu hosi Mane 25 no Feto 25. Serimónia ne’e hala’o iha resintu IPB, kinta ohin, 07/07/2022.
Primeiru Vise Prezidente, Sr. Cipriano Tilman, M.PA reprezenta hosi Magnífiku Prezidente IPB hateten katak ba momentu espesiál ida ne’e finalista hamutuk na’in-50 partisipa judisium, maibé entre sira ne’e estudante ida ho naran Duarte Mouzinho fila hikas ba aman maromak la konsege simu sertifikadu. Vise hatutan katak dezáfiu no obstakulu sira maka Institutu ida ne’e hasoru, maibé imi la lakon esperansa kontinua la’o bá oin i ohin loron imi konsege finaliza imi nia estudu, maske liu hosi sofrementu ida ke bo’ot. Hafoin loke abertura ba serimónia Judisium datoluk (III) nian tinan 2022.
Sr. Celestino Goncalves T. Mali, M.Ec.Dev nu’udar kordenadór kursu Produsaun Animal hato’o ba estudante sira katak ohin loron ne’e espesiál tebes ba judisiáriu sira no parabéns ba imi hotu nia susesu. Estudante sira konsege ultra pasa dezáfiu sira no remata sira nia estudu. Nafatin husu ba estudante sira labele kontenti deit ho rezultadu ne’ebé mak iha, maibé koñesimentu ne’ebé ita bo’ot sira hetan husi kursu ida ne’e, tenki hatudu imi nia matenek iha komunidade sira.
Iha fatin hanesan, Diretór Eskola Superiór Agronómia i Zootéknika Sr. Gaspar Ferreira Vicente, M.Sc hateten iha momentu ida ne’e marka tán istória ida tan hodi realiza serimónia judisium ba datoluk (III) nian. Ita hotu senti orgullu maské institutu ne’e foun maibé konsege realiza judisium refere. Iha sorin seluk, Diretór hatutan ba judisiáriu sira katak matenek ne’ebé mak ita bot sira iha atu bele implementa koñesimentu sira ne’ebé mak iha, bele kria servisu ba an rasik no ba ema seluk.
Partisipa iha serimónia ne’e hanesan Primeiru Vise Prezidente, Sr. Cipriano Tilman, M.PA, Segundu Vise Prezidente Sr. Amancio Horacio, Dirétor DNAF Sr. Domingos Faria, Diretór DNA Sr, Marito Soares, Diretór Eskola Enjeñaria Sr. Fernando da Costa Fernandes, M.Eng, Diretór Eskola Superior Agronomia i Zootéknika Sr. Gaspar Ferreira Vicente, M.Sc, Kordenádor Kursu Enjeñaria Sivil Sr. Afranio M. G. Freitas, ST, MT, korpu dosentes produsaun animal, funsionáriu administrasaun, partisipante no inan-aman sira.
Mídia IPB
