Serimónia Graduasaun Kursu Nivél IV Ba Dosente IPB Hamutuk Na’in-16
Dili, 16 Dezembru 2022
Instituto Politékniku Betano serbisu koperasaun hamutuk ho Sentru Formasaun Polisia Akadémia (Siglá Portugés,CFPA) hodi realiza serimónia graduasaun datoluk nivél IV kursu edukasaun,formasaun no avaliasaun ba dosente IPB hamutuk nain-16 ho tema “A formação pedagógica dos Docentes agregará habilidades e contribuirá para a qualidade do ensino superior”. Serimónia ne’e realiza iha salaun CFPA-Comoro Dili.
Magnífiku Prezidente IPB, Sr. Acacio Cardoso Amaral iha diskursu hateten katak serimónia ohin loron, hanesan rezultadu ka fuan hosi MOU ne’ebé asina ona entre IPB no CFPA. Objetivu maka atu estabele koperasaun iha edukasaun no treinamentu liuhosi halo formasaun hodi hasa’e koiñesimentu ba membru sira iha ida-idak nia instituisaun.
“Ohin loron ami sira ne’e kompleta ona aula intensivu durante semana-rua (2), tuir kedas estájiu iha serbisu fatin, formasaun ne’e ami aprende buat barak kona-bá dezenvolve kurikulum,planu lisaun, planu sesaun, planu avaliasaun no seluk seluk tan”.Haktuir Prezidente IPB.
Ikus liu, prezidente hakarak hato’o agradesimentu ba CFPA nia disponibilidade fo ona formasaun ba dosente IPB no ba futuru sei iha tan formasaun kontinuasaun ba dosente foun ne’ebé rekruta iha tinan ida ne’e ho dosente seluk ne’ebé la konsege tuir formasaun iha tinan 2022.
Iha fatin hanesan, Komandante Superintendente Dr.Arquimino Ramos hakarak Agradese ba loron Ohin marka tan istoria hahu estabelese koperasaun IPB,ohin ita realiza tan serimónia pelumenus halo mudansa ruma iha formasaun ne’e rasik. Agradese mós ba dosente sira hosi IPB no UNPAZ konsege ultrapasa ona formasaun refere, Atu atinji ida nee presiza esforsu makas.
Komandante salienta katak nafatin kopera serbisu hamutuk,CFPA fornese ona formasaun ba universidade no institutu lubuk ida,signifika dosente sira bele iha koñesimentu ona ,formasaun ne’e rasik hodi ajuda tebes ba dosente sira iha abilidade hodi hanorin ne’ebe di’ak presiza iha padraun hafoin hamosu peskiza ida maibé dosente sira presiza aprende hela de’it no korajén ba dosente sira seluk tuir mai sei iha tan formasaun pedagójia.
“Liu hosi formasaun ne’e hau fiar katak bele ajuda ita boot sira sai hanesan mata dalan ba dosente sira iha IPB,fiar katak ita bot sira dezenvolve ona planu hotu tuir mata dalan ne’ebé ami fo,ba futuru sei hatudu progressu ne’ebé di’ak nomos tenki garantia ba kualidade estudante sira”. Dehan Sr.Komandante.
Iha sorin seluk, Sra.Danina Nunes hanesan reprezentante hosi graduadus sira hakarak hato’o agradese ba estrutura IPB no serbisu hamutuk ho estrutura CFPA hodi fo formasaun durante semana rua (2). Espera katak ho matenek ne’ebé fahe ona mai ami, nune’e bele fahe ba estudante sira hodi garantia kualidade aprendizajen iha rai doben Timor ida ne’e,hahu agora ba futuru no signifika katak edukasaun Timor Leste la’o di’ak liuhosi ita nia kontribuisaun.
Serimónia ne’e partisipa hosi mak Inspetór Jeral IPB, Sr.Roberto da Costa Magno, Primeiru Vise Prezidente IPB, Sr. Cipriano Tilman, MPA, Segundu Vise Prezidente IPB, Sr.Amancio Horacio, Diretór DNAF, Sr. Domingos Faria, Diretór DNA Sr. Marito Soares, Diretor DNAAEIT (Diretor Nasional Administrasaun Akadémiku no IT), Sr.Pedro de Deus, M.Si, Diretor EZAS (Eskola Superior Agronomia e Zootéknika) Sr. Gaspar Vicente Fereira, M.Sc, Diretor ESE (Eskola Superior Engenharia) Sr. Fernando Fernandes, M.Eng, Koordenador KPA (Kursu Produsaun Animal), koordenador KKS (Kursu Konstrusaun Sivil),reprezentante UNTL, ANAAA,Komandante komponente formasaun, membru polisia akadémia, prezidente komisaun UNPAZ,Dosentes UNPAZ no ekipa tékniku IPB.
Média IPB
