Vizita Kortezia Hosi Sua Exelénsia Ministru MESCC No MOP Iha IPB

Betano, loron 08, fulan Agostu 2023 (IPB) – Institutu Politékniku Betano hetan vizita hosi Sua Excia Ministru Ensinu Superior Siénsia i Kultura (Siglá Portugéz, MESCC) Sr. José Honorio no Sua Excia Ministru Obras Públika (MOP) Sr. Samuel Marçal, hala’o sorumutu ho estrutura IPB koalia kona-ba projetu konstrusaun foun IPB.

Iha sorumutu ne’e Magnífiku Prezidente IPB, A/Prof. Acacio Cardoso Amaral, Ph.D dahuluk agradese ba 90 guvernu sua exelênsia Ministru MESCC, Ministru MOP, Prezidente EDTL, Diretór jeral ADN, Diretor Jeral Planeamentu no Finansa (MESCC) ho ekipa sira nia prezensa mai vizita direta iha IPB.

haktuir hosi Prezidente IPB katak aproveita ho tempu ida ne’e, husu apoiu nafatin ba exelénsia sira tau matan nafatin ba planu ne’ebé maka iha ona, tuir duni planu estratéjiku dezenvolvimentu nasional 2011-2030 ne’ebé mak konstrui ona hanesan IPB. Hosi sorin seluk prezidente IPB esplika mós kona-bá estabelesimentu ezisténsia IPB ba sua exelénsia ho nia ekipa sira.

Iha fatin hanesan, Ministru Obras Públika (MOP) Sr. Samuel Marçal hateten katak objetivu mai vizita iha IPB hodi rona informasaun sira hosi estrutura IPB, saida maka IPB presiza hodi nun’e ami bele hato’o ba iha nivel altu hodi buka solusaun hamutuk.

Reforsa tan katak “Hau ho Sr. Ministru Ensinu Superior foin simu kna’ar ida ne’e iha 90 governu foin mak fulan rua nia laran. Iha loron 120 ne’e ami nia konsentrasaun ba de’it mak planu sira hanesan hadia lei organika sira, orsamentu ratifikativu no programa sira seluk ba tinan-5 nian hodi hetan aprovasaun iha Parlamentu, balun passa ona no balun seidauk”. Dehan Sr. Ministru Obras Públika.

Iha sorin seluk, Ministru Ensinu Superior salienta katak hanesan membru governu foun hahú ona planu programa no lei organiku sira mak pasa ona iha Parlamentu. Teni tan katak iha programa ba tinan 5 nian, propoin IPB nia projetu ba faze daruak kontinua iha tinan 2024 no sei aprezenta mos lei bázika ministerial Ensinu Superior iha Konsellu ministru hodi bele hetan aprovasaun hosi Parlamentu. Ikus hakarak agradese ba estrutura IPB tomak ne’ebé mak simu ami ho di’ak. Sorumutu ne’e hala’o iha sala Gabinete Prezidente IPB, tersa ohin, (08/08/2023).

Partisipante sira iha sorumutu ne’e mak hanesan primeiru Vise Prezidente IPB, sr. Cipriano Tilman, M.PA segundu Vise Prezidente IPB, sr. Amancio Horacio, Koordenador kursu produsaun animal, Prezidente EDTL, Diretór jeral ADN, Diretor Jeral finansas MESCC, koordenadora UPPC-MESCC ho nia enjiñeiru no funsionáriu IPB

.

Hafoin bá monitoriza projetu konstrusaun foun IPB, hodi hatene rezultadu servisu kompañia

CICO ba konstrusaun refere.

Média IPB.