IPB Realiza Orientasaun Akadémika No Kampu Ba Estudante Foun Tinan 2024
Betano, 26 Fevereiru 2024 – Instituto Politékniku Betano (IPB) liu hosi komisaun organizadora orientasaun tinan akadémika 2024 realiza atividade orientasaun akadémika ba Estudante foun no tuan durante loron tolu (3) hahú hosi loron segunda, 26 to’o kuarta, 28 Fevereiru 2024 ho tema “Transmite Koñesimentu Hodi Mellora Mentalidade Disíplina no Kapasidade Estudante Foun Antes Entrega iha Ambiente Akadémiku”. Atividades Orientasaun ne’e hala’o iha kampus IPB Betano.
Prezidente Komisaun Organizadora Sr. Celestino G. Talo Mali aprezenta relatóriu kona-bá preparasaun orientasaun akadémika tinan 2024 Estudante ne’ebe maka partisipa iha Orientasaun hamutuk na’in 95 ho total estudante foun hamutuk nain 86 no estudante tuan nain 9. Hosi Eskola Superior Engenharia hamutuk Estudante nain 50 no Estudante hosi Eskola Superior Agronomia no Zooteknika hamutuk nain 45. Lori komisaun organizadora nia naran hato’o agradesimentu ba orador sira ne’ebé mak simu ona konvite hodi marka prezenza atividade orientasaun akadémika no kampu tinan 2024.
Iha fatin hanesan Magnifiku Prezidente IPB, Prof. Acacio Cardoso Amaral, Ph. D hato’o ben-vindu ba estudante foun sira 2024 ita nia vaga ita preve ba tinan ida ne’e ita preve ba 462, maibé agora ne’ebé tur iha auditóriu ne’e hamutuk 95 kompostu hosi estudante foun 86 no estudante tuan hamutuk na’in sia (9). Tamba saida maka ita halo orientasaun nia objetivu fo koñesimentu ba alin estudante sira ne’ebe foin mai atu koiñese ambiente no sistema akadémika iha IPB, orientasaun akadémika ida ne’e obrigatóriu ita tenke tuir hetan sertifikadu ida ne’e, sei persiza aprezenta bainhira imi ba estajiu Profisional no bainhira imi tuir Judisium no graduasaun ne’ebé obrigátoriu gosta ka la gosta imi tenke tuir. Enkoraja nafatin ba estudante foun partisipa to’o hotu no husu ba komisaun organizadora asaun saida de’it tenki asaun edukativu.
Prezidente IPB nafatin hato’o preokupasaun ne’ebé mak IPB infrenta hanesan Diploma II ba estudante foun sira katak asuntu ida ne’e kompeténsia Ministériu Ensinu Superior, maibé semana kotuk ne’e hetan ona aprovasaun hosi Konsellu Ministru ba Diploma II ba Diploma III ba leten no sei lori ba iha Parlamentu Nasional no Presidente Republika hodi promulga. Sorin seluk maka Prezidente IPB kontinua abertura ba atividade orientasaun durante loron tolu (3).
Palestra dahuluk hosi orador sira mak hanesan Prezidente Autoridade Munisipiu Manufahi Sr. Luis Marçal da Costa Tavares ho tema “Papel Lideransa Lokal ba Implementasaun Politika Desentralizasaun tuir Decreto lei Nú 3/2016 iha Municipio Manufahi”, palestra daruak hosi Komandante PNTL Munisipiu Manufahi Sr. Domingos Gregorio Soares ho tema ”Papel PNTL no Seguransa iha Munisipio Manufahi”, palestra datoluk Magnífiku Prezidente Prof. Acacio Cardoso Amaral, Ph. D ho tema: “Perfil IPB”, palestra dahaat hosi Primeiru Vise Prezidente IPB, Sr. Cipriano Tilman, M.PA ho tema “Regulamentu Akadémiku IPB”, palestra dalima hosi tékniku DNAAEIT, Sr. Elisio A. T. Ximenes ho tema “Sosializa ba Utilizasaun Sistema Akadémika iha IPB” no palestra ikus liu hosi Prezidente Asosiasaun Estudantil Ir. Nuno de Deus Martins.
Atividade ne’e partisipa hosi prezidente IPB A/Prof. Acacio Cardoso Amaral Ph.D, Inspetór Jeral Sr. Roberto Magno, Primeiru vise Prezidente IPB Sr. Cipriano Tilman M.PA, Diretór DNAAEIT Sr. Pedro de Deus, M.Si, Diretór Eskola Superior Enjenharia Sr. Alexandre Marques, Diretór Eskola Superior Agronomia i Zootéknika Sr. Abilio Dos Santos ho nia Kordenadór Kursu Konstrusaun Sivil Sr. Aquino Vilde Acacio de Jesus no Kordenadór Kursu Produsaun Animal Sr. Jose Mendes no dosente no Estudante sira.
Média IPB
![](https://ipb.edu.tl/wp-content/uploads/2024/02/429666824_920925749820605_3444031949307399189_n-1-1100x733.jpg)
![](https://ipb.edu.tl/wp-content/uploads/2024/02/429757496_920926513153862_7493604228270811829_n-1100x733.jpg)
![](https://ipb.edu.tl/wp-content/uploads/2024/02/429817763_920925556487291_108530168599645971_n-1100x733.jpg)