IPB Realiza Seremónia Graduasaun Dahaat Ba Graduadu Na’in – 71

Betano, 25 Outubru 2023- Institutu Politékniku Betano (IPB) realiza seremónia Graduasaun ba dala-4 nian ho tema prinsipál mak hanesan “Formar os Graduados de Alta Qualidade em Ciência e Prática a Fim de Contribuir para Desevolvimento Nacionál”. Seremónia ne’e realiza iha Betano Same Manufahi iha loron 25 Outubru 2023.

Ohin loron, IPB realiza graduasaun ba dala-4 nian ho totál graduadu hamutuk na’in 71 hosi Eskola Superior Agronómia i Zootéknika, Kursu Produsaun Animal ho totál graduadu hamutuk nai’n 40 no husi Eskola Superior Enjeñaria Kursu Konstrusaun Sivil ho totál graduadu hamutuk nai’n 31.

Presidente IPB, A/Prof. Acacio Cardoso Amaral, Ph.D iha nia diskursu hateten katak ohin loron IPB realiza graduasaun ba dala-4, hosi kursu Produsaun Animal ho Kursu Konstrusaun Sivil. Ba graduadus sira importante atu hanoin katak edukasaun la remata iha ne’e ida ne’e foin hahu no presiza ita nia profisaun sei kontinua lao ba oin.

“Hau enkoraja ba graduadu sira sai ajente ba mudansa pozitivu iha imi ni aárea no iha sosiedadee tomak. Uza ita nia koñesimentu no abilidadee la’os de’it atu hetan benefísiu Pessoal, maibé mós atu kontribui ba hadia komunidade no ita-nia planet”. Dehan Magnífiku Prezidente IPB.

Ikus liu hodi IPB nia naran hakarak hato’o parabéns ba graduadu klase 2020 nian. Hein katak imi-nia mehi sira sei la iha rohan, imi-nia ambisaun sei la iha rohan no imi-nia susesu sei sai klean liu-tán.

Iha fatin hanesan, Sua Exélensia Ministru Ensinu Superiór, Siénsia no Kultura (MESSK), Sr. José Honório da Costa P. Jerónimo hakarak kongratula ba graduadu sira hotu ne’ebé finaliza ona sira nia estudu iha IPB nomós agradese ba estrutura maximu IPB tamba Institutu ida ne’e mudansa bot ne’ebé maka serbisu makas tebes.

Ministru Ensinu Superior relata kona-bá programa ministeriu nian ne’ebé tau ona iha planu sei hari tan politékniku tolu (3) iha Timor Laran, ida iha Lospalos, Manatuto no Kovalima para hodi halo mobilidade ba estudante sira hodi hala’o estudu. Iha sorin seluk koalia mós kona-bá lei baze ensinu superior hanesan lei ida hodi regulariza ensinu superior.

Graduadu Francisco de Jesus Matos iha nia diskursu salienta katak dahuluk hakarak hato’o sentimentu kontenti obrigadu no agradese ba IPB. Hanesan reprezentante graduadu sira, loron ohin halibur hamutuk iha fatin ida ne’e ba graduasaun ba dala-4 nian. Parabens ba ita hotu, loron ida ne’e maka ita hotu hein hodi marka istoria.

“Titulu ne’ebe leba iha kabas leten, obriga ita, atu sai ajende ba mudansa iha sosiedade, konhesimentu no kompetensia iha hetan ona atu kria impaktu pozitivu iha nasaun Timor – Leste”. Haktuir Francisco.

Ikus liu hakarak agradese ba estutura IPB, Dosente no funsionáriu administrasaun sira hotu iha IPB.

Partisipa iha serimónia graduasaun mak hanesan Estrutura IPB, Ministeriu sira, Vise reitor UNTL ho nia komitiva, DEI-UNTL, TIC TIMOR, IPB, Diretores Ezekutivu sira, Diretores Nasional sira, Diretor Municipal sira, Estrutura no membru komisaun instaladora, reprezentante administrador Manufahi,, Postu administrador, Superintendente PNTL Municipio Manufahi, Komadante F-FDTL postu Naval Betano Edukasaun Munisipiu Manufahi, Inan-aman, Dosentes IPB, funsionariu administrasaun no konvidadu sira.