IPB – ESE Realiza Serimónia Judisium Hodi Distribui Titulu Akadémiku Ba Finalista Na’in-49

Betano, 01 Setembru 2025 – Instituto Politekniku Betano (IPB) liu husi Eskola superior Enjeñaria (ESE) kursu konstrusaun sivil turnu 2022 hala’o Judisium ba dala VI, hodi distribui títulu akadémiku ba finalista haat-nulo resin Sia (49) kompostu husi Mane Tolu Nolu Resin- Neen(36) no Feto Sanulu Resin Tolu (13) ho nia tema “O Graduado está capacitado para participar e contribuir para o desenvolvimento das infraestruturas em Timor – Leste” iha resintu IPB-Betano.

Mestre Leonel Madeira hanesan Dosente iha Fakuldade Enjenãria Siensia no Teknolojia UNTL, iha nia Oratio Sapienstia refleta ho nia tópiku nune’e, Enjineirus Kualidade iha Obras Infraestruturas hanesan fundamentu ba dezenvolvimentu ekonómikus iha Timor-Leste. Nia mos dehan ba finalistas sira ita bo’ot sira sei hanesan Junior nafatin peskija no halo investigasaun atu nune’e bele suporta ita bo’ot sira nia abilidade tékniku nian, nune’e mos Tenki iha intensaun diak hodi proteje ita nia sosiedade no fo honra ba ita nia profisaun.

Iha tempu hanesan Kordenador Kursu Konstrusaun Sivil Mestre Aquino iha nia intervensaun dehan judisium ne’e hanesan prosesu akadémiku ida ne’ebé hodi halo divulgasaun ba titulu estudante ida iha nivel Ensino superior nian nune’e mos katak estudante sira konklui ona prosesu tomak iha Institutu Superior ida. Nia mos dehan ba Inan- Aman sira husi estudante sira ne’ebé hala’o judisium signifika katak sira livre ona husi prosesu administrasaun akadémiku nian hodi hein deit ba graduasaun.

Diretor ESE Alexandre Marques hateten, agradese ba estudante sira hotu ne’ebé maka mai husi Munisípiu ketak-ketak sai família ida deit iha IPB, agradese ba sívitas akadémikas tomak, jardineiru sira seguransa, magnífiku prezidente ne’ebé sempre akompaña no suporta prosesu tomak husi eskola superior enjeñaria kursu Konstrusaun Sivil nian. Diretor ne’e mos hateten ba estudante sira katak tenki kaer prinsípiu tolu maka hanesan : Skill, Knowledge and Attitude maka sai hanesan baze hodi kompete nu’udar tékniku professional ida.

Intervensaun Magnífiku prezidente IPB Sr. Alcino Isaac A. Fernandes, hateten nain hira ne’ebé maka ohin judisium marka tan istória bo’ot ida hanesan prezidente IPB no istória diak ida ba Inan no Aman sira no furak liu ba finalista sira ne’ebé ohin hala’o judisium. Haksolok ba judisium ba dala VI ho nia tema “O graduado está capacitado para participar e contribuir para o dezenvolviamento das infraestruturas em Timor-Leste” husi tema refere atu heteten katak estudante sira iha ona formasaun ne’ebé kapasitadu no presija ita bo’ot sira nia partisipasaun total ba prosesu dezenvolvimentu iha rai doben Timor-Leste.

Marka prezensa iha serimónia Judisium ne’e mak hanesan Primeiro Vise-Prezidente no Segundo Vise-Prezidente IPB, Inspesaun Geral, Diretor EZAS, Diretor DNAAEIT, Diretor DNAF, Diretor Aprovizionamentu, Xefi Departamentu Logístika nomos Xefi Departamentu IT, estudante no konvidadus sira. Media IPB