ENSERAMENTU BA ATIVIDADE ORIENTASAUN IPB TINAN AKADÉMIKA 2021

Betano, 22 Fevereiro 2021 (IPB) – Institutu Politékniku Betano liu hosi Komisaun organizadora IPB ensera atividade orientasaun akadémika ba tinan ida ne’e, durante loron 3 nia laran iha kampus IPB. (segunda, 22/02).

“Parabéns ba estudante sira ne’ebé hosi inísiu to’o agora sira nafatin pasensia hodi kumpri orientasaun ne’e to remata, atividade refere fahe parte rua mak hanesan; orientasaun akadémiku responsavél hosi Institutu no orientasaun kampu responsavél hosi Komisaun organizadora, normalmente kandidatus sira bele ona sai estudante IPB”. Haktuir hosi Prezidente IPB, Acácio Cardoso Amaral.

Entretantu prezidente Komisaun Orgazidora, José Mendes hatete katak agradese ba alin estudante sira ne’ebé mak ultrapasa ona regulamentu orientasaun refere, iha momentu ne’e nafatin louva ba komisaun sira tuir seksaun hodi fasilita alin estudante sira iha inísiu orientasaun ne’e lao ho di’ak durante loron 3 nia laran.

Alende ne’e mós, prezidenti komisaun mós aprezenta relatóriu finál ba atividade refere.

Partisipa iha enseramentu ne’e, Magnífiku Prezidente IPB Acácio Cardoso Amaral Ph.D, Diretór Eskola Superior Enjeñaria, Diretór Agronomia no Zootécnica, Koordenadór Produsaun Animal no Koordenadór Konstrusaun Sivil , Prezidenti komisaun organizasaun, Prezidenti Asosiasaun Estudantil no estudante sira hotu.

Mídia IPB