SERIMÓNIA “DIES NATALIS” IPB BA DAHAAT (IV) NIAN

Betano, 23 Fevereiru 2021 (IPB) – Institutu Politékniku Betano selebra aniversáriu ba dahaat (IV) nian, iha kampus IPB Betano-Manufahi, (23/02)Magnífiku Prezidenti IPB Acácio Cardoso Amaral, Ph.D, iha nia diskursu hateten katak hato’o agradesimentu no bemvindu ba konvidadus sira hotu nia prezensa haksolok iha loron espesiál ida ne’e, loron ne’ebé importante tebes ba IPB ne’ebé mak eziste ba tinan haat (4) nia laran.

Ho Dies Natalis ba IV nian, fiar katak hasa’e abilidade liuhusi kumpri nafatin vizaun no misaun hodi lori IPB sai di’ak liu iha futuru. Maibé iha komitmentu atu kumpri nafatin vizaun no misaun ne’ebé mak hatur ona iha estatutu, maske institutu ida ne’e foun. IPB mós hala’o ona kooperasaun ho entidades lubuk ida, prinsipalmente UNTL no sentru formasaun Tibar atu bele oferese intensivu ba estudante sira hodi hala’o prátika.

Iha tinan kotuk liu-bá (27/11/2020), IPB konsege halo graduasaun dahuluk ho totál graduadu hamutuk 158 no tinan ne’e ami iha planu atu halo tan graduasaun, antes fin de anu.Tuir planu refere (PEDN), politika Ensinu Superior mak iha Edukasaun pos Ensinu Sekundáriu (TECVOC no ESEG) sei kontinua ba ramu rua hanesan, sira ne’ebé remata ESEG sei kontinua ba Universidade atu sira aprende siénsia no Arté. ESTV sei kontinua ba Ensinu Superiór Tékniku, ida ne’e sei inklusi Kursu ne’ebé spesífiku iha Politékniku.

Alende ne’e tuir planu estratejiku, iha Timor-Leste sei hari’i Politékniku 3 no Akadémia Peska ida. Tamba ne’e kriasaun IPB hanesan implementasaun ba planu estratejiku 2011-2030 nian.“Tinan ida ne’e liuhosi Ensinu Superiór preve orsamentu iha fundus infrastrutura hamutuk tokon ida liu, atu inísiu konstrusaun ba edifísiu foun iha rai Betano ektáres sanulu (10)”. Haktuir Prezidenti IPB.

Iha fatin hanesan, reprezentante Ministru Ensinu Superiór, Siénsia no Kultura (MESSK), Diretóra Jerál Fernanda Lay iha nia diskursu salienta katak ba selebarasaun dahaat nian ne’e importante tebes no parabéns ba prezidenti, vise prezidenti no estrutura IPB ba servisu tomak, ba empeñu dedikasaun ne’e iha kbiit no forsa atu lao nafatin ba oin.

Tamba hahu tinan ida ne’e, asumi totalidade nia kompeténsia, atu asumi nu’udar Instituisaun Ensinu Superiór, akadémika, finanseira, administrativa no patrimonial ba susesu IPB. “IPB sei iha kondisaun infrastrutura, rekursus umanus ne’ebé seidauk sufisiente atu atinji kualidade exelensia ba formasaun nian, atu atinji Ensinu Superiór ba kualidade Institutu refere sai mós dezafiu bo’ot ida, maibé tempu sai hanesan obrigasaun ida ba sosiedade rai ne’e nian, tamba ne’e presiza kontinua servisu makas, kompeténsia, konsiénsia atu servi Timor Leste. Iha intervensaun ikus ne’e, MESSK nafatin apoiu no kolaborasaun ba Institutu IPB ne’ebé dezempeña ba papel fundamental atu dezelvolve rai ida ne’e”. Tenik Diretóra Lay.

Hafoin serimónia IPB dahaat (IV) nian, akompaña hosi Prezidenti IPB, Vise prezidenti no estrutura tomak lori reprezentante Ministru Ensinu Superiór Dr. Lay, ho ninia ekipa, Reitór UNTL ho ninia ekipa, komandante polisia PNTL Munísipiu Manufahi no konvidadu sira hodi vizita laboratóriu prátika IPB nian.

Partisipa iha selebrasaun ne’e, Magnífiku Prezidenti IPB Acácio Cardoso Amaral Ph.D, Vise Prezidenti I, Cipriano Tilman, M.PA, Vise Prezidenti II Paulo da Silva M.Eng, Diretór Eskola Superiór Enjeñaria no Agronomia no Zootéknika, Kordenadór Eskola Superiór Enjeñaria no Agronomia no Zootéknika, Sivitas Akadémika IPB, Korpu Dosentes IPB, Ministru Ensino Superior reprezentante Diretór Jerál Fernanda Lay, Diretór Jerál Administrasaun no Finansas, Reprezentante Administradór Munísipiu Manufahi, Reitór UNTL Dr. João Soares Martins, MPH, Ph.D, Vise Reitora Asuntus Estudantíl UNTL, Ekipa Reitorál UNTL, Komandante PNTL munísipiu, Komandante F-FDTL postu Betano, Diretór Nasionál Ensinu Superiór Tékniku, Diretor Jerál Nasionál Universtáriu, Diretór Edukasaun Munísipiu Manufahi, INFORDEPE Manufahi, reprezentante hosi ANAA, estudantes no konvidadu sira hotu.

Mídia IPB