IPB – TIC TIMOR, IP: Formasaun Kona-Bá Sistema Ofísiu Atu Fasilita Funsionáriu IPB
Betano, 16 Setembru 2022 – Institutu Politékniku Betanu (IPB) liu hosi gabinete primeiru vise prezidente IPB, Diresaun Nasionál Administrasaun Akadémika, Estudantil no IT (DNAAEIT) ho Ajénsia Teknolójia Informasaun no Komunikasaun (Siglá Portugéz, TIC TIMOR IP) realiza formasaun kona-bá sistema ofÍsiu IPB iha sala gabinete prezidente IPB.
Primeiru vise prezidente IPB, Sr. Cipriano Tilman,M.PA reprezenta hosi Magnífiku prezidente IPB, hato’o agradesimentu no bemvindu ba tékniku TIC TIMOR, IP hodi fó formasaun ba funsionáriu sira liliu iha sistema ofÍsiu. Vise akresenta IPB presiza tebes formasaun ne’e hodi bele fasilita tebes ba funsionáriu administrasaun sira, nune’e ba oin bele fasilita arkivu ba karta sira hotu iha IPB ho di’ak.
”Ikus hau espera katak formasaun ne’e bele loke ona ami nia funsionáriu sira nia hanoin kona-bá sistema arkivu elektróniku iha ida-idak nia diresaun ho di’ak. Dehan Sr. Cipriano.
Iha fatin hanesan sr. Sarmento Tong hanesan Officer Dezenvolvedór Software Profísionál hateten katak agradese ba konfiansa husi IPB hodi bele dezenvolve sistema ofísiu ida ne’e no implementa iha IPB. Ekipa treinadora ne’e mai ho objetivu atu fó formasaun ba funsionáriu sira oinsá bele utiliza ofísiu ida ne’e hodi hafásil servisu administrasaun IPB nian.
“Ofísiu nu’udar aplikasaun ne’ebé bele ajuda IPB hodi dijitaliza karta-tama no karta-sai no arkiva karta sira ne’e ho objetivu atu diretiva IPB bele hatene paradeiru karta ruma”. Dehan sr. Tong
Iha formasaun refere, sr. Norberto Cristovão hateten sistema ne’e dezenvolve tuir rekezitu hosi IPB nian nune’e ho aprezentasaun ne’e rasik hodi kompleta informasaun hotu hosi parte IPB nian.
Hafoin remata formasaun, ekipa TIC TIMOR, IP atribui sertifikadu apresiasaun simbólikamente ba funsionáriu na’in-4, maibé totál funsionáriu hamutuk na’in-20 partisipa formasaun refere sei hetan mós sertifikadu.
Entretantu, formasaun ne’e partisipa hosi Inspetor Jeral IPB, Sr. Roberto, segundu vise presidente IPB, sr. Amancio Horacio, Diretór Nasionál Administrasaun Finansas (DNAF), sr. Domingos Faria, Diretór Eskola Superior Enjeñaria (ESE), sr. Fernando da C. Fernandes, M.Eng, Xefe departementu, funsionáriu administrasaun IPB, ekipa tékniku TIC TIMOR sr. Sarmento Tong, Officer Dezenvolvedór Software Profísionál, sr. Norberto Cristovão, Junior Dezenvolvedór Software Profísionál, sra. Adelia Soares treinadora, sr. Michael Rodrigues, Junior Profísionál Multimedia.
Media IPB: Elisio
Foto: Elisio
