Asina Nota Entendementu Entre IPB Ho POLINEMA-MALANG INDONESIA

Asina memorandum entendementu iha loron 10 Jullu 2023 – Institutu Politékniku Betanu (IPB) Prezidente IPB, Prof. Assoc. Adj. Acacio Cardoso Amaral, Ph.D ho nia estrutura sira sorumutu ho Politeknik Negeri Malang (POLINEMA) Malang-Indonesia Sr. Diretor Supriatna Adhisuwingnjo, ST., MT, hodi asina memorandum entendementu/MoU, entre parte rua, iha kampus sentral Polinema-Malang, Sigunda, 10/07/2023.

Objetivu hosi asinatura memorandum entendementu /MoU ne‘e atu garantia servisu kooperasaun bilateral entre parte rua hodi haforsa kualidade eduksaun iha futuru ne’ebe diak.

Hato’o hosi Magnífiku Prezidente IPB Prof. Assoc. Adj. Sr. Acacio Cardoso Amaral, Ph.D fo apresiasaun ba diretor ho nia estrutura sira hotu ne’ebe mak ho vontade bo’ot hodi simu IPB no aprezenta mos kona-ba perfil IPB ne’ebé mak harii iha 2017 hanesan Institutu foun ida iha Timor-Leste.

“Ezistensia IPB to agora ami foin fo graduasaun ba dala tolu espera katak fulan oin sei iha tan graduasaun ba dala hat no ami iha estudante ne’ebé mak volume ki’ik kompara ho estudante iha POLINEMA, ami sei aprende barak hosi POLINEMA tanba IPB hanesan politékniku primeiru iha Timor-Leste no ami iha eskola superior rua mak hanesan eskola superior agronomia no zootéknika ho nia kursu produsaun animal no eskola superior engeñaria ho nia kursu konstrusaun sivil” Tenik Prezidente.

“Ida ne’e hanesan memorandum entendementu ne’ebé ita asina ona no hau fiar katak ba oin ita tenki iha memorandum entendementu espesifiku ida hodi fo oportunidade ba kapasitasaun rekursu humanu hosi IPB mai POLINEMA, ami hanesan instituisaun foun ida ne’ebé foin hamrik kompara ho instituisaun sira seluk tanba ne’e ami persiza aprende barak hosi POLINEMA liu-liu iha kapasitasaun dosente, kurikulu no ami seidauk iha kurikulu politekniku propriu maibe ami lao tuir kurikulu padaraun nasional ne’ebe implemeta ona iha universitariu”.lamenta Prezidente.

“Hau fiar katak liu hosi MoU ida ne’e ba oin iha estudante internasional hosi Timor-leste sei kontinua estudu iha ne’e bele aumenta ho estudante internasional sira hosi nasaun seluk no ami nia espetativa ba oin mak ita sei halo rotasaun ba dosente liu-liu iha kursu konstrusaun sivil ami mos hakarak hetan esperensia barak hosi POLINEMA tanba ami hanesan instituisaun foin ida hamriik no ami nia bagckround laos ema politekniku ho nune ami fiar katak ba oin ami sei hetan formasaun espesializaun no esperenia balu atu bele kapasita ami nia dosente sira, ita bele kolabora servisu hamutuk iha peskiza no publikasaun, seminariu internasional sira iha POLINEMA no IPB” haforsa Prezidente.

Iha fatin hanesan hato’o hosi Sr. Diretor Supriatna Adhisuwingnjo, ST., MT, hateten ami agredese barak ba IPB vizita ona ami no ami sente orguilho tebes bele hetan vizita internasional espera katak ba oin liu hosi sorumutu ne’e bele fasilita mos estudante timor oan sira mai kontinua estudu iha POLINEMA tuir akordu ne’ebe previstu ona iha MoU atu garantia servisu hamotuk hodi bele realiza atividades hotu hodi bele dezenvolve instituisaun rua ne’e iha futuru no iha kooperasaun diak iha futuru.

“Estusante hotu hakarak aprende iha POLINEMA tanba fatin ne’e sai hanesan fatin favoritu ba sira tanba hetan suporta masimu hosi komunidade Jawa Timur, Jawa Indonesia ne’ebe mak hola parte iha malang no total estudante regular hamutuk empat belas ribu ne’ebe mak ho volume boot iha Politeknik negri hotu iha Indonesia no ami nia estudante sira kobre ona iha nasional no internasional”Tenik Diretor.

“Iha tinan 2018 Ami mos fo oportunidade ba estudante internasional sira hodi hala’o estudu iha ne’e kuaze hetan graduasaun ona iha tinan kotuk no ami nafatin fo oportunidade ba estudante internasional sira no ami nia prinsipiu maka oinsa tranforma edukasaun ne’ebe kualidade no motivasaun ne’ebe mak positivu ba estudante internasional sira espera liu hosi kooperasaun ne’e IPB mos bele hola parte atu kontinua estudu iha POLINEMA” hatutan Diretor.

Entertantu iha enkontru refere Prezidente IPB ho nia estrutura sira hala’o diskusaun direta ho estrutura departemenu engenharia sivil hodi koalia kona -ba progresu no dezafiu balu ne’ebe mak kursu konstrusaun sivil hasoru no iha biban ne’e mos troka hanoin entre parte rua hodi dezenvolve iha futuru.

Remata iha diskusaun refere Prezidente IPB ho nia estrutura sira hala’o vizita internalmente iha kampus POLINEMA hodi haree kona laboratoriu departementu kostrusaun sivil, laboratoriu departementu mekanika, laboratoriu departementu elektro laboratoriu kimika no hetan mos eplikasaun kona ba prosesu utilizasaun laboratoriu hosi ekipa tekniku POLINEMA.

Iha sorumutu asina MoU ne’e partisipa hosi IPB hanesan Magnífiku Prezidente IPB Prof. Assoc. Adj. Acacio Cardoso Amaral, Ph.D, Primeiru Vise Prezidente IPB Sr. Cipriano Tilman, M.PA, Segundu Vise Presidente IPB, sr. Amancio Horacio, Diretór Eskola Superior de Agronomia no Zootéknica (ESAZ) Sr. Gaspar Ferreira Vicente, M.Sc, Diretór Eskola Superior Enjeñaria (ESE) Sr. Fernando da Costa Fernandes, M.Eng.

Média IPB.