PB HO BNCTL HALA’O ENKONTRU BÁ PREPARASAUN ESTABELESIMENTU KOPERASAUN SERVISU

Dili, 23 Janeiru 2024 – Instituto Politékniku Betano (IPB) nia Magnífiku Prezidente, Prof. Acacio Cardoso Amaral, Ph.D ho ekipa hala’o enkontru ho Sr. Zelio B. Amaral da Costa hanesan Jerente Divizaun Operasional hodi koalia kona-ba asuntu koperasaun entre IPB no Banco Nacional e Comerçio Timor – Leste (BNCTL). Enkontru ne’e halao iha edifisiu BNCTL Mandarin, Dili.

Objetivu hosi sorumutu aborda asuntu 3 (tolu) importante maka hanesan Planu estabelesimentu koperasaun servisu pagamentu estudante, instalasaun makina Automatic Machine Teller (ATM) no atendementu espesial ba pesoal designado finansas IPB ba levantamentu no deposito iha Banco.

Prezidente IPB, Prof. Acacio Cardoso Amaral, Ph.D, hateten katak dahuluk agradese ba Ekipa BNCTL ne’ebe mak responde ona IPB nia karta, ohin ita konsege realiza enkontru dahuluk ba preparasaun koperasaun nian.

“Objetivu Prinsipal maka IPB hakarak integra Sistema Pagamentu online ba estudante iha IPB, nune’e atu evita estudante sira ba formatura naruk, ita hatene katak agora ne’e teknolojia avansadu tebes, nune’e precisa halo adaptasaun ba Sistema pagamentu sira nune’e, bele asesu iha kualker sukursal sira BNCTL ne’ebe mak eziste iha kada munisípiu.” Haktuir hosi Prof. Acacio.

Iha fatin hanesan Vice-Prezidente asuntu administrasaun, planu, finansas no koperasaun IPB nian, Sr. Amancio Horacio hatutan katak iha asuntu tolu (3) importante ne’ebe maka ohin hato’o ona hosi Prof. Acacio, tamba ne’e iha hanoin atu estabelese koperasaun entre IPB ho BNCTL.

Vice-Presidente mos akresenta durante ne’e iha pagamentu propinas estudante sei utiliza hela Sistema manual, ita hatene katak estudante ne’ebe mai husi munisípiu sanulu resin rua (12), tamba pagamentu proprinas ba estudante sira gasta tempu husi fatin dok mai selu iha resintu IPB, ho hanoin ida maka IPB presiza kopera ho BNCTL atu nune’e estudante sira selu proprinas diretamente iha banku liu husi Sistema Pagamentu online maka sei lao husi estabelesimentu koperasaun ida ne’e.

Iha sorin seluk Vice-Presidente mos realsa katak atendementu espesial ba pesoal designadu finansas IPB ba levantamentu no depozitu osan no intalasaun makina ATM. Asuntu tolu (3) ne’e karik bele presiza integra iha akordu ida, karik ida ne’e susesu ita agradese koperasaun ida ne’e.

Iha fatin hanesan, Sr. Zelio hatan ba preokupasaun husi IPB ne’ebe mak hato’o ona husi IPB katak BNCTL bele responde ba pagamentu propinas estudante ne’ebe maka sei integra Sistema SIGA nomos atendementu espesial ba pesoal designadu finansas IPB nian.

“Husi parte IPB no BNCTL presizamente liu husi Jurista sira sei prepara dokumentu ba akordu ba koperasaun atu nune’e iha tempu badak bele formaliza koperasaun ida ne’e ”. Haktuir Jerente BNCTL.

Partisipa iha sorumutu ne’e mak hanesan Diretór DNAAEIT, Sr. Pedro de Deus, M.Si, Diretor DNAF, Sr. Domingos Faria, L.Agp, no Jurista Deolindo Sarmento da Silva.

Media IPB