IPB REALIZA SERIMÓNIA HASA’E BANDEIRA IHA FULAN FEVEREIRU TINAN 2024

Institutu Politékniku Betanu kontínua hasa’e bandeira kada fulan ba semana dahuluk, ohin segunda (05/02/2024) responsavél hasa’e bandeira hosi estudante Eskola Superior Agronómia no Zootéknika (ESAZ), Kursu Produsaun Animal no koru responsavel hosi funsionariu IPB iha resintu IPB Betano.

Dahuluk, Magnífiku Prezidente IPB, Prof. Acacio Cardoso Amaral, Ph.D, hakarak fó parabéns bá ekipa isar bandeira, tamba ezekuta servisu ho di’ak, kada fulan ita hasa’e bandeira dala ida, hodi fó onra ba erói nasional sira liuhosi hasa’e bandeira tenki hatudu vontade di’ak, disiplina ba tempu.

Iha serimónia hasae bandeira ne’e, Prezidente informa ba estrutura IPB, korpu dosentes, administrasaun pesoal fo hanoin deit katak disiplina oras, presiza kumpri regulamentu. Prezidente propoin atu iha tempu badak monta “finger print” atu nune’e hodi kontrola funsionariu tomak liuhosi sistema elektronika.

“Aproveita tempu ida ne’e, atu fó hatene ba ita boot sira katak semana kotuk estrutura IPB balu hamutuk ho Ministeriu Ensinu Superior no UNTL tuir serimonia anúnsiu rezultadu Admisaun Asesu Ensinu Superior publiku (UNTL ho IPB), iha eventu refere Sr. Ministru mos relata katak katak Lei baze ensinu superior ne’ebé fo dalan ba Politekniku sira atu konfere grau Diploma III ba leten, tuir planu semana ida ne’e sei halo agenda iha konsellu ministru. Kona-ba ida ne’e ita sei halo tuir ho entidade nivel altu sira no kona-bá Lei Baze Ensinu superior ne’e IPB laiha kompeténsia atu altera, ida ne’e kompetensia nivel altu sira nian (Konsellu Ministru sei aprova, hafoin sei lori ba Parlamentu Nasional no ikus liu sei lori ba PR atu promulga), nune’e ita so bele halo tuir no hein. Ita espera katak sei iha rezultadu diak ba ita hotu”. ”. Dehan Sr. Prezidente IPB.

Partisipa iha serimónia hasa’e bandeira ne’e mak hanesan Prmeiru Vise Prezidente IPB, Sr. Cipriano Tilman, M.PA Diretór DNAAEIT (Diresaun Nasional Administrasaun Akadémika no IT) Pedro de Deus M.Si, Diretór DNAF Sr. Domingos Faria, Diretor Eskola Superior, Kordenador kursu Konstrusaun Sivil (KKS) no kordenador Kursu Produsaun Animal (KPA), Xefe Laboratoriu, Xefe Departamentu Logistika, Xefe departamentu Finansas, Staff Administrasaun, Dosentes no estudante IPB hosi kursu rua (2).