Inspetór Isar Bandeira Apela Bá Ekipa Elaborasaun Kurríkulum Tenki Funsiona Ho Máximu

Institutu Politékniku Betanu (IPB) kontínua hasa’e bandeira kada fulan ba semana dahuluk, ohin segunda (01/07/2024) responsavél hasa’e bandeira no koru hosi funsionáriu administrasaun iha resintu IPB Betano.

Primeiru vise prezidente IPB Sr. Cipriano Tilman, M.PA, sai hanesan inspetór hasa’e bandeira reprezenta Magnífiku Prezidente IPB, Prof. Assoc. Adj. sr. Acacio Cardoso Amaral, Ph.D, hakarak fó parabéns bá ekipa isar bandeira, tamba ezekuta servisu ho di’ak, kada fulan ita hasa’e bandeira dala ida, hodi fó onra ba erói Nasional sira liuhosi hasa’e bandeira tenki hatudu vontade di’ak, disiplina ba tempu.

Iha serimónia hasa’e bandeira ne’e, inspector isar bandeira relata ba estudante sira liu-husi vizitasaun sua exelénsia ministru ensinu superior hato’o mai ita katak iha oportunidade ba iha tinan 2024-2025 lei baze ministerial liliu ba iha kurrikulum bele aprezenta proposta ba iha ministériu hodi hetan aprovasaun ba Diploma III.

“Atu husu ba ekipa elabora kurrikulum tenki funsiona ho maximu, nune’e iha tempu badak relata ba ministeriu, liliu ba ekipa ne’ebé reprezenta IPB ba iha Jakarta hodi tuir formasaun kurrikulum iha preparasaun di’ak hodi kria enkontru ida hodi aprezenta kurríkukum oinsá hodi hasa’e ba Diploma III”. Hato’o husi Sr. Inspetór.

Partisipa iha serimónia hasa’e bandeira ne’e mak hanesan segundu vise prezidente IPB, Sr. Amancio Horacio, Diretór DNA, Sr. Domingos Faria, Xefe Departamentu sira, funsionáriu Administrasaun, Dosentes no estudante IPB hosi kursu rua (2). Media IPB