ESTUDANTE KKS TURNU 2025 HALA’O ESTUDU KAMPU NO SURVEY FATIN BA FUTURU ENJEÑARIA IHA ESTV AKAR-LARAN KOVALIMA.

Kovalima, 07 de Agostu 2025, Instituto Politékniku Betano (IPB) liu husi Eskola Superior Enjeñaria (ESE), Kursu Konstrusaun Sivil (KKS) hala’o atividade Estudu kampu liu husi estudante turnu 2025 akompaña mos ho Dosente disiplina sira maka hanesan Ingles para Enjeñaria, Gestão de Obra, Estrutura Betão Armado, hala’o vizita estudu iha auto Estrada (Jalan Tol) no Ponte Mola Zumalai iha Kovalima durante loron rua, 07-08 Agostu 2025.

Objetivu husi vizita estudu kampu ne’e hasa’e koñesimentu estudante sira kona-bá lala’ok oinsa halo Ponte no lala’ok Estrutura Ponte nian ba estudante sira hodi bele hatene projetu implementasaun real iha terenu atu nune’e bele mellora diak liu-tan koñesimentu hodi hasa’e kapasidade tékniku diak ida ba futuru.

Iha loron tuir mai dosente hamutuk ho estudante sosializa kona-bá misaun kursu konstrusaun sivil nian, rekursu humanus, fasilidade no infra-estrutura kursu konstrusaun sivil nian ba estudante iha Eskola Secundária Geral Publiku de Zumalai.

Iha fatin hanesan, estudante sira no dosente halo vizita ba eskola sekundaria tékniku vokasional Akar laran hodi hare diretamente fasilidade hanesan fatin ba diretor eskola, fatin ba adjuntu, aula ba professores, aula apredizajen, haris fatin, asrama ba mane no feto no mos fasilidade sira seluk tan.

Iha sorin seluk maka, estudante konstrusaun Sivil turnu 2025 halo jogu amizade ho joventude suku Labarai postu administrativu Zumalai Munisípiu Covalima, partisipa iha jogu refere xefi suku Labarai, kominidade Labarai, Koordenador Konstrusaun Sivil, dosente Konstrusaun Sivil no estudante sira.

Partisipa iha atividade refere mak hanesan Koordenador Kursu konstrusaun Sivil, dosente IPB, estudante KKS turnu 2025, Diretor eskola, Professores no estudante iha Eskola Secundária Geral Publiku Zumalai. Media IPB