CFPA-IPB ABERTURA FORMASAUN PEDAGÓJIA BÁ DOSENTE SIRA

Betano, 12 Jullu 2022

Institutu Politékniku Betano nia Magnífiku Prezidente IPB Sr. Acacio Cardoso Amaral,Ph.D ho nia estrutura no dosente sira partisipa iha formasaun pedagójia ne’ebé hala’o hosi Sentru Formasaun Polisia Akadémia (Siglá Portugéz, CFPA-Comoro), Komandante superintendente xefe polisia Dr.Cand. Arquimino Ramos ho nia ekipa, ohin loron tersa, 12 Jullu 2022 abertura kona-bá formasaun pedagójia bá dosente sira no formasaun refere hala’o durante semana rua (2) iha kampus resintu IPB.

Objetivu hosi formasaun ne’e atu garantia serbisu bá dosente sira hodi dezenvolve koiñesimentu implementasaun planu kurikulár no Peskiza iha IPB.

Komandante Superintendente Dr. Arquimino Ramos iha diskursu hateten katak formasaun ida ne’e bele dezenvolve koiñesementu dosente sira nian iha planu kurikulár no mos peskiza tanba hare’e ba realidade universidade barak mak seidauk implementa formasaun ida ne’e maibé IPB no UNTL bele implementa formasaun refere.

“Liu hosi formasaun ne’e hau fiar katak bele ajuda ita boot sira sai hanesan mata dalan ba dosente sira iha IPB no labele banati tuir ema seluk nian, hau fiar katak ita bot sira sei dezenvolve planu hotu tuir mata dalan ne’ebé ami fo hau fiar ba futuru sei hatudu progressu ne’ebé di’ak ita mos hare katak tinan-tinan ita produz ema barak husi universidade ita mos tenki garantia ba kualidade estudante sira ne’e nian tanba ita hanesan ema manorin ita tenki responsabilidade ba ita nia estudante sira”. Dehan Komandante.

Iha fatin hanesan, Prezidente IPB iha diskursu akresenta mós katak iha momentu ida ne’e di’ak tebes mai iha IPB ita bele aproveita matenek balu ne’ebé husi ita timor oan sira no orgullu ho produtu ita nian rasik, nia hatutan formasaun ohin loron importante no espesialmente ba IPB hodi hasa’e koiñesementu dosente sira nian liu hosi formasaun pedagójika. Alende ne’e kontinua abertura ba formasaun pedagojika iha IPB

“Hare’e ba realidade agora IPB laos diak liu instituisaun nasional sira iha timor leste maibé ho nia progressu ne’ebé neneik maibe ami nafatin aprende wainhira iha enkontru nivel nasional hau tenta halo aproxima ho lideransa sira ne’ebé iha influensia di’ak atu oferese hanoin hodi dezenvolve IPB parte spesial ida Polisia akadémia”. Tenik Prezidente

Partisipa iha abertura formasaun nee hosi IPB mak hanesan Magnifiku Prezidente IPB, Sr. Acacio Cardoso Amaral, Ph.D, Primeiru Vise Prezidente IPB, Sr. Cipriano Tilman, MPA, Segundu Vise Prezidente IPB, Sr. Amancio Horacio, Diretor DNAAEIT (Diretor Nasional Administrasaun Akadémiku no IT), Sr. Pedro de Deus, M.Si, Diretor EZAS (Eskola Superior Agronomia e Zootéknika) Sr. Gaspar Vicente Fereira, M.Sc, Diretor ESE (Eskola Superior Engenharia) Sr. Fernando Fernandes, M.Eng, Koordenador KPA (Kursu Produsaun Animal), koordenador KKS (Kursu Konstrusaun Sivil) no korpus dosente sira hotu.

Mídia IPB