Ekipa IPB Ho DEI-UNTL Hala’o Enkontru Daruak Kona-Bá Fornesimentu Dadus Atu Estabelese Sistema SIGA-IPB

Instituto Politékniku Betano nia Segundu Vise Prezidente Sr. Amancio Horacio ho nia estrutura hala’o sorumutu daruak ho Diretór Departementu Enjeñaria Informatika, Fakuldade Enjeñaria Siensia no Teknolojia, Universidade Nasional Timor – Lorosa’e (Siglá Portugés, DEI-FECT UNTL) Sr. Vosco Pereira M. Eng, ho nia ekipa. Sorumutuk ne’e ho obajetivu atu rekoila dadus informasaun hosi IPB hodi estabelese Sistema Informasaun Jestaun Akadémika (Siglá Portugés, SIGA). Enkontru ne’e hala’o iha sala gabinete prezidente IPB hosi oras 14.30 – 15.30 Otl.

Sr. Amancio Horacio hanesan Segundu Vise Prezidente IPB agradese tebes ba ekipa DEI-UNTL ne’ebé to ona iha resintu IPB no liuhosi meius komunikasaun oioin ita bele serbisu hamutuk hodi fornese dadus ba malu, tamba ne’e importante tebes IPB atu fornese dadus informasaun IPB nian ba ekipa DEI-UNTL, nune’e iha tinan ida ne’e IPB, bele iha sistema SIGA rasik hodi jere serbisu akadémika nian bele lalais no fasil.

Alende ne’e, Diretór DNAAEIT (Diresaun Nasional Administrasaun Akadémika no IT) Sr. Pedro Deus, M.si salienta katak ajenda importante maka rekolla dadus hosi IPB, ohin loron parte IPB liu-liu iha akadémiku bele fornese dadus hotu ne’ebé presiza ba ekipa DEI-UNTL, maibé iha dadus balu maka sei prepara hela hosi tekniku sira. Dadus dadus ne’ebé mak iha ona bele fornese no servisu hotu atu lao ho diak no lalais depende ba dadus ne’ebé mak IPB fornese ba ekipa DEI-UNTL. Wainhira atu hetan dadus ida no prezisa tempu to’o semana ida, sei impede ba prosesu hotu. Tan ne’e ekipa IPB esforsu atu fornese lalais dadus tuir tempu ne’ebé mak termina ona. Iha sorin seluk, hakarak agradese ba ekipa ne’e, tamba bele to’o iha direita iha IPB hodi hare kondisaun jeral ne’ebé IPB no hakarak serbisu hamutuk ho ekipa hodi elabora servisu ne’e di’ak liu tan.

Iha fatin hanesan Sr. Vosco Pereira, M.Eng n’udar Diretór Departementu Enjeñaria Informatika hateten katak agadrese ba parte IPB ne’ebé simu ona ekipa iha fatin ida ne’e. Hau hanesan parte Sistema nian no Sr. Nicolau iha parte Infrasturtura nian, asuntu dahuluk mak faze rekolla dadus. Tamba ne’e iha sistema ne’ebé ita implementa bazeia ba nesesidade IPB nian no funsionamentu iha laran bazeia ba dadus ne’ebé mak iha. Sistema ne’e fahe ba parte rua; ida maka sistema informasaun no ida mak parte akadémika nian. Iha parte akadémiku nian tenke kompleta atributu sira iha komponente tolu ne’ebé importante tebes mak hanesan Dosentes, Estudante no Kurikulu.

Iha sorumutu ne’e partisipa hosi Segundu Vise Prezidente IPB, Sr. Amancio Horacio, Diretór DNAAEIT Sr. Pedro de Deus, M.Si, Kordenador Kursu Produsaun Animal, IT, Admin IPB, reprezenta hosi Kursu Konstrusaun Sivil, Diretór DEI,Sr. Vosco Pereira, M.Eng no Sr.Nicolau IT-DEI hosi Infrastrutura nian.