Enseramentu Formasaun Pedagójia Bá Dosente Nai’n-16 Iha IPB

Betano, 22 Jullu 2022

Ohin loron sexta, 22 Jullu 2022, Institutu Politékniku Betano nia Magnífiku Prezidente IPB Sr. Acacio Cardoso Amaral, Ph.D ho nia estrutura sira no Sentru Formasaun Polisia Akadémika, Komandante Superintendente Dr. Arquimino ho nia ekipa sira hodi ensera atividade formasaun pedagójia ba dosente IPB nian ne’ebé maka durante ne’e tuir formasaun refere durante semana-rua (2) iha resintu IPB.

Prezidente IPB Sr. Acacio Cardoso Amaral, Ph.D iha nia diskursu hateten katak agradese ba formador/a polisia akadémika tamba durante ne’e ami bele aproveita matenek balu ne’ebé husi ita timor oan, liuhosi formasaun durante semana rua ami aprende ona materia barak. Sorin seluk prezidente esplika mós ezisténsia institutu IPB to ohin loron

“Formasaun ne’e la para de’it iha ne’e, maibé sei nafatin kontinua formasaun kurríkulu no formasaun sira seluk, tamba ita halo ona koperasaun ho polisia akadémika”. dehan prezidenti.

Iha fatin hanesan, komandante Superintendente Dr. Arquimino Ramos iha ninia intervensaun salenta katak agradese tebes ba parte hotu-hotu tamba formasaun durante semana rua ne’e atividade lao ho di’ak, agradese ba konfiansa ne’ebé mai hosi IPB. Iha sorin seluk nia hatutan katak formasaun ida ne’e bele dezenvolve koiñesementu dosente sira nian iha planu kurikulár no mos peskiza  atu garantia bá kualidade.

Iha sorin seluk, Sra. Danina Nunes ne’ebé reprezentante hanesan formandu sira hato’o obrigadu no agradese ba ekipa formador/a hosi sentru formasaun polísia akadémika ne’ebé fahe ona imi nia matenek no fahe ona esperiénsia mai ami durante semana rua. Ikus liu hau atu hatete de’it katak formasaun mak termina ona, maibé sira nia servisu barak sei implementa iha servisu fatin.

Partisipa iha enseramentu formasaun ne’e hanesan Magnifiku Prezidente IPB, Sr. Acacio Cardoso Amaral, Ph.D, Diretor DNAAEIT (Diretor Nasional Administrasaun Akadémiku no IT), Sr. Pedro de Deus, M.Si, Diretor EZAS (Eskola Superior Agronomia e Zootéknika) Sr. Gaspar Vicente Fereira, M.Sc, Diretor ESE (Eskola Superior Engenharia) Sr. Fernando Fernandes, M.Eng, Koordenador KPA (Kursu Produsaun Animal), koordenador KKS (Kursu Konstrusaun Sivil), Komandante Polisia Manufahi Sr. Jonia Viana, Komandante Superintendente ho nia ekipa no dosentes sira

Mídia IPB