ESE-KKS-IPB REALIZA SERIMÓNIA JUDISIUM BA FINALISTA NA’IN-50

Betano, 09 Agostu 2022

Institutu Politékniku Betano (IPB) liu hosi Eskola Superiór Enjeñaria, Kursu Konstrusaun Sivil (ESE-KKS) realiza serimónia Judisium ba datoluk (III) nian, totál estudante sira partisipa iha judisium ne’e hamutuk 50 kompostu hosi Mane haatnulu resin rua(42) no Feto ualu(8). Serimónia ne’e hala’o iha resintu IPB, tersa ohin, 09/08/2022.

Magnífiku presidente IPB señor Acacio Cardoso Amaral, Ph.D hateten katak judisium ne’e importante tebes bá estudante sira tamba momentu espesiál ne’ebé sira hetan koñesimentu katak sira passa ona depois kumpri kritéria lubuk ida durante sira nia períudu estudu. Iha momentu ne’e hodi familia boot IPB nia naran, hakarak fó parabéns bá judisiáriu sira ne’ebé remata ona sira nia estudu. Nune’e loke abertura ba serimónia Judisium datoluk (III) nian tinan 2022.

“Hau espera ho titúlu ne’ebé imi hetan sei sai bukae atu habelar utilizasaun siénsia matenek no abilidade tuir misaun no misaun ESE no IPB rasik”. Dehan prezidente

Iha sorin seluk prezidente kongratula ba dosente no estudane finalista ESE-KKS 2019 kontribui ona ba buat lubuk ida mak hanesan kampu futsal no bee tatudak (Air mansur) iha resintu IPB

Señor Afraino Marcal G. Freitas, ST, MT hanesan kordenadór Kursu Konstrusaun dehan katak finalista na’in-50 ohin simu judisium ba datoluk nian no parabéns ba imi hotu nia susesu. Nia hatutan valor diploma ne’e la sai sasukat hodi desidi imi nia nivél kapasidade, maibé esperiénsia no prátika reál no atitude maka sai susukat.

Agradese no orgullu tebes ba finalista 2019 tamba sira simu matenek iha dosente sira no sira prátika siénsia iha terenu no realidade hatudu rezultadu iha IPB hanesan laborátoriu, kampu futsal no bee tatudak (Air mansur)”. Dehan kordenadór

Iha fatin hanesan, Diretór Eskola Superiór Enjeñaria Sr. Fernando da C. Fernandes apresia bá kandidatu graduandu sira ohin tuir serimónia judisium, ne’e hanesan prosesu ikus nian, nafatin enkoraja ba finalista sira siénsia ne’ebé ita bot sira hetan tenki aplika iha terenu nune’e presiza kontinua nafatin estuda makas no aprende bebeik importante maka hatudu imi nia matenek, atitude no etika.

Reprezentante Judisiáriu Romaldo de Andrade haktenik katak ohin loron sai hanesan loron ksolok ne’ebe mak ita hotu espera, tamba buat ne’ebé mak durante hein no esforsu maka sai hanesan inisiu iha prosesu estudu tomak. Agradese wain ba estrutura IPB no dosente ESE-KKS ne’ebé kapasita ona sira iha prosesu aprendizajén tomak no koñesimentu ne’ebé mak sira hetan.

Partisipa iha serimónia ne’e hanesan Inspetór jeral, Sr. Roberto da. C. Magno, SP, MM,QIA, Primeiru Vise Prezidente, Sr. Cipriano Tilman, M.PA, Segundu Vise Prezidente Sr. Amancio Horacio, Dirétor DNAF Sr. Domingos Faria, Diretór DNA Sr, Marito Soares, Diretór Eskola Superior Agronomia i Zootéknika Sr. Gaspar Ferreira Vicente, M.Sc, korpu dosente konstrusaun sivil, funsionáriu administrasaun, partisipante no inan-aman judisiarius sira.

Mídia IPB : Elisio

Foto: Elisio