Eskola Superior Agronómia no Zootéknika, Kursu Produsaun Animal Realiza Serimónia Judisium Ba Judisiariu 48 Períodu II

Betano, 01 Outubru 2021 (IPB)

Institutu Politékniku Betano liu hosi Eskola Superiór Agronomia i Zootéknika, Kursu Produsaun Animal (ESAZ-KPA) realiza serimónia Judisium ba daruak nian, totál estudante sira partisipa iha judisium ne’e hamutuk 48 kompostu hosi Mane 25 no Feto 23. Serimónia ne’e hala’o iha kampus IPB.

Dahuluk Sr. Celestino Talo Mali nu’udar kordenadór kursu Produsaun Animal hato’o mensajén ba estudante sira katak ohin loron ne’e espesiál tebes ba judisiáriu sira no parabéns ba imi hotu nia susesu. Maské kursu Produsaun Animal lakon nia estudante ida iha ita hotu nia le’et, maibé nafatin reprezenta nia familia ida hodi partisipa iha serimónia ne’e. Nafatin husu ba estudante sira labele kontenti deit ho imi nia rezultadu ne’ebé mak iha, maibé hakarak hato’o ba judisiáriu sira koñesimentu ne’ebé ita bo’ot sira hetan husi kursu ida ne’e tenki hatudu imi nia matenek iha komunidade nia le’et no ba fatin sira mak imi hela ba. Salienta mos ba judisiáriu sira katak tenki iha planu ne’ebé dia’k hodi bele implementa koñesimentu sira mak iha, bele kria servisu ba an rasik no ba ema seluk.

Hanesan Primeiru Vise Prezidente, Sr. Cipriano Tilman, M.PA reprezenta Magnífiku Prezidente IPB iha nia diskursu salienta mos katak ba momentu espesiál ida ne’e, imi nia prezensa lahanesan bai-bain, wainhira ita hare’e alin sira kontenti tebes, tanba alin sira finaliza ona imi nia estudu. Husi parte seluk haktuir mos istoria balun katak, iha tinan 2018 alin sira hahú prosesu aprendizajen, hatudu katak imi mos senti duni furak no aat sira, dezáfiu no obstakulu sira maka Institutu ida ne’e hasoru, maibe imi la lakon esperansa kontinua lao ba oin i ohin loron imi konsege finaliza imi nia estudu, maske liu hosi sofrementu ida ke bo’ot. Haktuir mos ba judisiariu sira katak ba sira ne’ebé mak hetan valór mellór tuir despaixu ministeriál valór 3.00 ba leten, Institutu bele enkamiña ba Ministériu hodi bele hetan bolsu estudu ba kontínua estudu iha Universidade sira seluk. Ikus atu taka enkoraja nafatin estudante sira katak valor Muito Bom, Bom no Sufisiente ne’e la sai sasukat ba ita bo’ot sira nia moris, maibé atu hetan servisu ou lae depende ba ida-idak nia esforsu.

Iha fatin hanesan, Diretór Eskola Superiór Agronómia i Zootéknika Sr. Pedro de Deus iha nia diskursu hato’o parabéns ba estudante finalista sira ne’ebé mak ohin loron konsidera espesíal hodi realiza serimónia ida ne’e, mesmu hasoru dezafiu ne’ebé ita bo’ot sira infrenta maibé konsegue finaliza to’o nia rohan. Salienta mos Judisium ida ne’e hanesan faze ida hosi prosesu hotu ne’ebé mak atu termina iha Institutu ida ne’e, antes to’o iha graduasaun tenki hala’o judisium, importante tenki kompleta rekezitus administrasaun hotu ne’ebé estabelese iha fatin ida ne’e. Iha parte seluk informa mos ba finalista sira katak haree ba lei baze edukasaun Institutu ida ne’e atribui Diploma “D2” ne’ebé haktuir mos iha estatutu provizóriu IPB nian. Lei mak regula ita, liliu iha lei baze edukasaun, iha artigu 20º Institutu sira ne’e iha prosesu ensinu nian to’o iha Diploma “D2”. Maibe nafatin enkoraja katak labele haree ba grau sira mak iha, importante mak imi nia koñesimentu sira mak imi hetan husi Instituto ida ne’e bele kadi nafatin no aprende diak liu tán ba oin. Ikus taka haktuir, mudansa ba futuru iha ema ida-idak nia a’an rasik. “Hafoin ikus liu loke abertura ba serimónia Judisium daruak 2021.

Partisipa iha serimónia ne’e hanesan Primeiru Vise Prezidente, Dirétor DNAF, Diretór DNA, Diretór Eskola Enjeñaria, Kordenádor Kursu Enjeñaria Sivil, korpu dosentes, funsionáriu administrasaun no partisipante inan-aman sira.

Mídia IPB