IPB-FDCH: Asina Kontratu Bolsa Hakbi’it Ba Estudante IPB Na’in-32 Tinan 2023

(Betano, 08 fulan Maiu 2023) – Institutu Politékniku Betanu (IPB) nia Vise prezidente IPB ne’ebé mak reprezenta hosi Magnífiku Prezidente IPB, Sr. Acacio Cardoso Amaral, Ph.Dhodi partisipa iha serimónia asina kontratu ba estudante IPB na’in-32 ba bolseiru hakbi’it tinan akadémiku 2023 husi Fundu Dezenvolvimentu Kapitál Umanu (FDCH) ne’ebé koloka ba iha Eskola Superior Agronomia i Zootéknika (ESAZ) no Eskola Superior Enjeñaria (ESE). Serimónia asina kontratu ne’e hala’o iha laboratóriu EZAS IPB.

Hanesan primeiru vise prezidente IPB, Sr. Cipriano Tilman reprezenta magnífiku prezidente IPB hato’o bemvindu ba ita nia ekipa FDCH ho laran luak to iha fatin ne’e hodi asina kontratu bolsa hakbi’it iha IPB.

Vise prezidente deklara ba ekipa FDCH katak bolseiru ne’ebé mak oferese mai iha IPB hahu hosi tinan 2021 iha estudante bolseiru hamutuk na’in-20, tinan 2022 bolseiru hamutuk na’in-40, lolos hamutuk ne’en-nulu maibé estudante na’in-2 maka transferénsia ba eskola fatin seluk no estudante tinan 2023 total hamutuk na’in-32.

“Ami fiar katak hosi bolsa hakbi’it ida ne’e labele para de’it iha ne’e, maibé ba tinan oin nafatin ho laran luak fó ba ita nia hakbiit sira, fiar katak bolseiru sira ne’e sei fiar metin ho apoiu ida ne’e sira kontenti hodi kontinua sira nia estudu to’o remata”. Dehan Sr. Cipriano

Iha fatin hanesan, Diretór Nasional Administrasaun Finansas sr. Evaristo Pinto Horacio ne’ebé mak reprezenta diretór Ezekutivu FDCH realsá katak ho bolsa hakbi’it ida ne’e hanesan faze kontinuasaun ne’ebé maka fundus kapital umanu finansia ba orsamentu nian no bolsa ne’e rasik ba institutu privadu no públiku hanesan IPB ho UNTL ne’ebé rekrutadu direta hosi Ministériu Ensinu Superior, Siénsia no Kultura (Siglá Portugéz, MESCC).

“Objetivu prinsipál ba alin sira mak tenki estuda didiak tamba ne’e aproveita oportunidade di’ak ba alin sira nia estudu iha IPB ne’ebé hetan ona bolsa hakbi’it ida ne’e”. Hateten diretór Evaristo.

Iha sorin seluk, ekipa FDCH apela ba estudante bolseiru sira katak alin sira ne’ebé hetan bolseiru ida ne’e regra ba alin bolseiru maka labele isin rua liliu ba alin feto sira, tamba orsamentu bolsa hakbi’it ne’e kompletu hodi responde alin sira ba propinas no kustu devida estadu maka selu.

Totál estudante bolsa hakbi’ít iha kursu produsaun animal, eskola superior agronomia hamutuk na’in-19 no iha kursu konstrusaun sivil, Eskola Superior Enjeñaria hamutuk na’in-32. Tamba ne’e hosi ekipa FDCH prepara ona kontratu hodi halo esplikasaun ka regulamentu konteúdu kontratu ba alin sira antes sira asina hodi entrega fila fali ba ekipa FDCH.

Partisipa iha serimónia maka hanesan Inspetór Jeral, sr. Roberto da Costa Magno, Diretór Eskola superior Agronómia no Zootéknika (ESAZ). sr. Gaspar F. Vicente, M.Sc, Diretór Eskola Superior Engenharia (ESE), sr. Fernando da Costa Fernandes, Dosente Mariano reprezenta kordenadór Kursu Konstrusaun sivil, estudante bolseiru no ekipa FDCH.

Media IPB