IPB Ho UNTL Asina Akordu Tékniku Atu Estabelese Sistema Informasaun Akadémika

Dili, 31 Janeiru 2022

Institutu Politékniku Betano nia Magnífiku Prezidente IPB Sr. Acacio Cardoso Amaral, Ph.D asina akordu tékniku ho Magnífiku Reitór UNTL Dr. João Soares Martins, MPH, Ph.D atu estabelese sistema informasaun akadémika ne’ebé implementa ona husi Fakuldade Enjeñaria no Siénsia Teknolójia, Departementu Enjeñaria Informatika (FEST-DEI) ho naran Sistema Informasaun Akadémika (SIA) no IPB iha interese tebes atu implementa programa ida ne’e. Tamba programa ida ne’e fasil atu halao jestaun ba sitema informasaun akadémiku nian ho diak no lalais. Serimónia asina akordu tékniku ne’e hala’o iha sala Auditoria Gabinete reitoria UNTL iha loron 31 fulan Janeiru tinan 2022.

Iha serimónia ne’e, Magnífiku Prezidente IPB esklarese katak agradese no apresia tebes ba Magnifiku Reitor estrutura tomak hodi realiza asina akordu tékniku ida ne’e, tamba presiza tempu ne’ebé kelur uitoan atu halao negosiasaun ho entidade hotu-hotu to’o ohin bele realiza  asina akordu ida ne’e nu’udar Koperasaun entre UNTL ho IPB ba estabelesimentu Sistema Informasaun Akadémika iha IPB atu nune’e bele hametin liu tan koperasaun entre Universidade no IPB ba futuru.

“Antes ne’e IPB halo ona koperasaun ho Departementu Enjeñaria Sivil UNTL no agora estabelese tan koperasaun ho Departementu Enjeñaria Informatika UNTL liliu iha programa SIA online nian no  ita rasik presiza identifika  Timoroan ne’ebé mak ne’ebé iha kapasidade atu halao serbisu hodi desenvolve rai ida ne’e no tenki fo konfiansa ba matenek ne’ebé sira iha hodi implementa iha instituisaun ne’ebé de’it laos IPB de’it maibé tenki implementa mós iha fatin seluk”, dehan Prezidente IPB.

Iha fatin hanesan Magnífiku Reitór Dr. João Soares Martins, MPH, Ph.D reálsa katak afinal UNTL iha siénsia ne’ebé implementa no pozitivu tebes no Instituisaun seluk hanesan IPB bele aprende tan husi UNTL no ba futuru UNTL loke a’an atu laos ba instituisaun públiku, maibé bele mos ba universidade privada sira. Husi sorin seluk  Magnífiku Reitór  agradese tebes ba Prezidente IPB ho nia estrutura tomak hodi halo koperasaun ho Universidade UNTL liliu iha programa sistema Informasaun Akadémiku ne’ebé dadaun ne’e FEST-DEI-UNTL implementa ona no espera iha tinan ne’e, IPB mós implementa  sistema refere.

Partisipa iha serimónia ne’e hanesan Segundu Vise Prezidente IPB, Sr. Amancio Horacio, Diretór Eskola Superior Agronómia no Zootéknika,Sr. Gaspar Ferreira Vicente, Diretór Eskola Superior Enjeñaria Sr. Fernando da Costa Fernandes, Diretór Administrasaun Akadémika no IT, Pro Reitora ba Asuntu Koperasaun, Profesora Dra. Lídia Gomes, Pro Reitora ba Asuntu Estudantíl, Profesora Eng. Lígia T. Correia, M.Sc.,, Dekanu FEST, Diretór Vosco Pereira, M.Eng no Vise Diretór DEI-FEST UNTL, Profesor Frederico Cabral, M.Eng no ekipa UNTL

Mídia IPB