Presidente IPB Fó Posé Ba Estrutura Asosiasaun Estudantíl

Betano, 15 Marsu 2022

Institutu Politékniku Betanu liuhosi Gabinete primeiru vise prezidente IPB ba Asuntu Tékniku Sientífiku, Pedagojka no Akadémiku realiza serimónia “Tomada de Posse” ba Prezidenti Asosiasaun Estudantíl ho ninia estrutura husi eskola superior Enjeñaria no eskola superior Agronomia no Zootéknika ne’ebé fó posé hosi Magnifíku Prezidente IPB. Serimónia ne’e realiza iha kampus IPB Betano, tersa ohin, 15/03/2022.

Magnfíku Prezidente IPB, Sr. Acacio Cardoso Amaral, Ph.D iha nia diskursu relata katak ohin loron kontenti ho prezensa prezidente asosiasaun estudantíl ho ninia estrutura tomak ne’ebé sei simu tomada de posse hodi hala’o sira ninia knaar tuir regulamentu mak hatur ona.

“Objectivu hosi organizasaun estudantíl AAEESAZ-IPB maka atu dezenvolve konsiénsia intelektuál, étika no moral estudante sira nia ne’ebé iha mós responsabilidade hodi hamosu komunidade akadémika ne’ebé sientífika no tau aas valor aprendidu, peskiza no servisu komunitáriu”. Dehan Prezidenti

Primeiru vise prezidenti IPB, Sr. Cipriano Tilman, M.PA relata katak momentu esensiál ida ne’e atu fó posé ba estrutura asosiasaun estudantíl sira signifika katak atu aumenta imi nia kapasidade iha asosiasaun tuir regulamentu ne’ebé iha hodi kumpri knaar ne’ebé ita bot sira atu asumi.

Iha fatin hanesan, Avelino Mendonça Ramos hanesan prezidente Asosiasaun Akadémika Estudantíl reálsa katak organizasaun estudante hanesan veíkulu ida ba estudante sira hodi promove sira nia kapasidade pesoal balun no hahalok sira nia matenek no integridade pesoal liga ba objetivu servisu ho karaktér edukasaun nian.

“Hau rekoñese hau nia an katak hau hetan fiar hosi estudantes IPB no sai hanesan prezidente eleitu AAE – IPB iha loron 03 – 02 – 2021. Durante mandatu ne’e hau rekoñese katak, seidauk halo buat ida iha IPB ba estudantes hotu hare, maibé hau sempre koalia kona-bá estudante sira nia preokupasaun iha enkontru”. Haktuir Avelino

“Hahu ba oin hau hakarak servisu hamutuk ho estudante no superior tomak IPB nian atu bele halo diak liu tan atividade AAE – IPB, hau hakarak planu sira ne’ebé ita koalia ona ita tenki halo ida ne’e laos loron koalia deit sei asaun”. Tenik Prezidente Asosiasaun Estundantíl

Serimónia ne’e partisipa hosi Magnfíku Prezidente IPB, Sr. Acacio Cardoso Amaral, Ph.D, Primeiru vise prezidenti IPB, Sr. Cipriano Tilman, M.PA, Segundu vise prezidenti IPB, Amancio Horacio, Diretor ESE, Sr. Fernando Fernandes, Diretor ESAZ, Sr. Gaspar Vicente, Kordenador kursu ESE no ESAZ, Dosentes no estudante sira.

Mídia IPB