Sua Exelénsia Ministru Ensinu Superior Husu Ba Estrutura IPB Elabora Proposta Foun Hodi Hasa’e Bá Diploma III

Betano, 28 Juñu 2024 (IPB) – Institutu Politékniku Betano nia Magnífiku Prezidente IPB ho estrutura hotu hala’o sorumutu ho Sua Exelénsia Ministru Ensinu Superior Siénsia i Kultura (Siglá Portugéz, MESCC), Dr. José Honório da Costa Pereira Jerónimo kona-bá Lei baze ensinu superior. Atividade ne’e hala’o iha salaun IPB-betano.

Magnífiku Prezidente IPB, Prof. Acacio Cardoso Amaral, Ph.D hakarak hato’o agradese wain bá exelénsia ministru ensinu superior ho nia komitiva sira nia prezensa mai vizita iha IPB.

Aproveita tempu ida ne’e Sr. Prezidente relata relatóriu badak kona-bá progreesu durante iha IPB katak atividade aprendizazen lao di’ak, Ezekusaun OGE mós lao di’ak (62.16%, 1,508, 174), Projetu 4 Lao hela, progresu balu Liu ona 50%. Armajen 2 ba Eskola superior 2, lojistiks no aprovizionamentu no mini matadouru no dosente balu ba tuir formasaun hela iha Indonesia.

“Agradese ba Lei baze ensinu superior hetan ona aprovasaun hosi Parlamentu Nasionál, Ami estabelese ona ekipa elaborasaun kurikulu ba diploma III, atu haree mós alterasaun estatutu IPB”. Haktuir Prezidente IPB.

Ministru Ensinu Superior Dr. José Honório da Costa Pereira Jerónimo iha nia diskursu hato’o katak durante iha fulan ualu nia laran preokupa ho Lei baze ensinu superior tamba importante tebes iha ensinu superior timor laran. Dahuluk atu rezolve uluk IPB nia kursu ne’ebé Diploma II tenki muda ba Diploma III, tamba ne’e aprovasaun final global iha Parlamentu Nasionál no hein Promulgasaun hosi Prezidente RDTL.

“Hau mai iha IPB ne’e atu informa ba estrutura IPB sira relasiona ho lei baze ensinu superior, tamba ne’e Estrutura IPB sira presiza prepara proposta foun hodi hasa’e nivel Diploma II ba Diploma III”. Dehan Sua Exelénsia Ministru Ensinu Superior.

Iha sorin seluk Sua Exelénsia relata katak presiza loke tan kursu balu, iha fulan jullu ka agostu mai ita hahu konstrusaun edifisiu foun, tamba primeiru ministru tau atensaun makas ba politékniku betano, sebele konstrusaun ne’e to’o 2026 finaliza ona. Ita presiza hadia IPB tamba uniku politékniku governu fo apoiu maximu ba Politékniku, tamba ne’e mak lei ne’e importante tebes.

Husu ba Prezidente IPB no estrutura presiza elabora kurríkulu Diploma II ba Diploma III hodi submete ba Ministériu Ensinu Superior.

Iha fatin hanesan Sua exelénsia husu ba Prezidente IPB no estrutura kuandu Prezidente Repúblika promulga, favor ida, presiza karta ba fali hodi hasa’e nia nivel Diploma II ba Diploma III hosi kursu rua ne’e no estudante ne’ebé mak remata ona atu bele fo espasu ba sira atu kontinua eskola ba Diploma III. Ba Futuru IPB lao di’ak ona, bele hasa’e nivel ba lisensiatura, Maestradu Pofessional ho Doutoramentu.

Ikus-liu remata sorumutu, Sua exelénsia ministru ho nia komitiva hamutuk ho prezidente IPB no estrutura observa direta ba progresu projetu konstrusaun iha otorita betano.

Partisipa iha Sorumutu ne’e mak hanesan, Inspetor Jeral IPB, Sr. Roberto Magno, Primeiru vise prezidente IPB, Sr. Cipriano Tilman, M.PA, Diretor Ensinu Superior, Sr. Higino Alves, Diretor Eskola Superior, Kordenador Kursu, Diretor DNA, Diretor DNAF, Xefe Departementu sira, dosentes, Funsionáriu administrasaun no ekipa ensinu superior. Média IPB