Elisio Ximenes

Betano, 26 Marsu 2022

            Institutu Politékniku Betano (IPB) liu hosi Eskola Superior Enjeñaria – Kursu Konstrusaun Sivil ne’ebé servisu hamutuk ho Sentru Formasaun Empregu no Formasaun Profesional (Siglá Portugéz,CNEFP) realiza serimónia distribuisaun sertifikadu ba formandu na’in-88 ne’ebé hala’o ona sira nia estudu prátika iha sentru formasaun Tibar, Posto Administrativu Bazartete, Munsipiu Liquiça. Serimónia ne’e realiza iha kampus IPB Betano.

Primeiru vise prezidente IPB, Sr. Cipriano Tilman, M.PA ne’ebé reprezenta Magnífiku Prezidente IPB salienta katak dahuluk apresia no kongratula ba Diretór CNEFP ho nia formador sira ho vontande di’ak bele fasilita estudante IPB hodi hala’o pratika iha sentru formasaun Tibár. Ba alin sira ne’ebé mak fila ona mai iha IPB dezeja parabens ba ita bot sira nia suksesu. Ba estudante sira ne’ebé atu kontinua ba iha sentru Formasaun Empregu no Formasaun Profesional Tibar apela ba alin sira tenki servisu hamutuk, kria unidade, estabilidade iha fatin ne’ebá, tamba sentru refere laos privadu maibé parseiru ho Institutu Politecnico de Betan, ba atu hetan formasaun hosi formandu sira atu eleva kapasitasaun iha ne’ebá no presiza aproveita oportunidade ho di’ak.

Iha fatin hanesan, Diretór CNEFP Sr. Simão Tito Barreto iha nia intervensaun hateten katak IPB tinan ida ne’e iha mudansa tebes ba fatin IPB nian. Nune’e husu ba formandu nai’n-88 ne’ebé mak halao ona sira nia estudu prátika iha sentru Formasaun Empregu no Formasaun Profesional Tibar. Agradese ba formandu sira nia interese no aprende duni iha sentru formasaun Tibar, tamba ne’e parabéns ba formando sira, imi iha potensia bot hodi banati tuir koñesimentu ne’ebé durante imi aprende iha sentru refere, nune’e hodi implementa iha kampus no ba sosiedade sira.

Iha sorin seluk, Saul dos Reis reprezenta formando IPB hakarak hato’o sentimentu no orgullu ba koperasaun servisu ne’ebé mak CNEFP ho IPB hala’o ona. Liu hosi biban ida ne’e hakarak hatoo agradesimentu ba Diretor CNEFP ba ita bot nia laran diak ba ami, la haluha hatoo agradese no obrigadu wain nomos ba formadores CNEFP.

Entertantu fahe sertifikadu ba formandu IPB hamutuk na’in-88 no entrega lembransa hosi CNEFP ba Estrutura IPB nian, alende ne’e kontinua kedas serimónia entrega lista estudante sira ne’ebé sei ba hala’o fali pratika iha sentru Formasaun Empregu no Formasaun Profesional durante fulan rua (2) nia laraan iha tinan 2022.

Serimónia ne’e partisipa hosi estrutura IPB, Diretór ESE (Fernando da Costa Fernandes, Kordenadór kursu Produsaun Animal (Celestino G.T.Mali), kordenadór Kursu Konstrusaun Sivil. Afranio Glaudes, Diretór DNAEEIT Pedro de Deus, Dosentes hotu iha kursu konstrusaun sivil, Xefi Departementu Finansas, Sra. Judit, Formadores CNEFP ho nia ekipa, PNDS  Munisípiu Manufahi ho nia ekipa, Alumni CNEFP, estudantes no konvidadus sira.

Media IPB : Elisio

Foto : Elisio

Betano, 26 Marsu 2022

Instituto Politékniku Betano (IPB) liu hosi Gabinete Primeiru Vise Prezidente IPB – Asuntu Tékniku Pedagojika no Akadémiku Sr. Cipriano Tilman, M..PA nu’udar reprezenta Magnífiku Prezidente IPB Sr. Acacio Cardoso Amaral, Ph.D ensera atividade orientasaun estudante foun tinan akademika 2022. Enseramentu atividade orientasaun ne’e hala’o iha kampus IPB Betano.

Iha seremonia ne’e Primeiru Vise Prezidente IPB, Sr. Cipriano Tilman, M.PA nu’udar  reprezenta Magnífiku Prezidente IPB hateten katak agradese bot ba estudante sira ne’ebé mak konsege mai to’o Betano bno turi orientasaun to final, signifika katak ita bot sira hetan ona legalidade atu sai hanesan estudante Institutu Politékniku Betano. Fiar katak ita bot sira tuir orientasaun ba momentu ida ne’e, bainhira kuandu la fila inan aman sira kontenti tamba oan-sira konsege tama iha institutu ne’e, maibé depende ba konsiénsia estudante ida-idak nian atu bele augenta to finál ka lae? Tamba prosesu ida ne’e presiza tempu naruk, hasoru dezafius barak hodi atinji nia objetivu no depende ba ema ida-idak nia esforsu. Dehan Sr. Cipriano.

Nia hatutan ho dezafius ne’ebé ita hasoru presiza hanoin didiak bainhira atu moris di’ak laos  hanesan milagre monu hosi lalehan deit. Maibe atu moris di’ak futuru iha ema ida-idak nia liman, ida-idak nia isin lolon to ikus bele hetan buat di’ak ruma. Ohin ita tanis, aban bainrua ita sei hamnasa, maibé hamnasa laos mai hosi lalehan no tenki esforsu, estuda makas para bele realiza metas ne’ebé mak ita hakarak to’o ba. Iha sorin seluk, agradese mós ba komisaun organizadora sira ne’ebé mak organiza orientasaun ne’e ho di’ak tebes.

Alende ne’e, Sr. Aquino hanesan Prezidente Komisaun organizadora relata katak tuir nesesidade komisaun ne’ebé hetan apoiu finanseiru ho montante osan $2,325 dolár amerikanu hosi osan orientasaun nian. Maibe atividade la’o ona hetan aumenta tan ho totál montante osan $2,400 dolár amerikanu ba orsamentu ba atividade refere. Nu’udar prezidente komisaun organizadora hakarak hato’o agradese ba membru komisaun organizadora sira nia partisipasaun tomak hodi realiza atividade refere ne’ebé lao durante loron lima (5) no lao ho di’ak.

Entertantu nia realsá katak partisipante ne’ebé partisipante hosi inísiu to’o remata hosi Kursu Produsaun Animal na’in 74 no na’in 9 la ativu, tamba laiha informasaun no iha Kursu Konstrusaun Sivil hamutuk na’in 50 no na’in 9 la ativu tamba komisaun la hetam informasaun.

Antes termina, nu’udar prezidente komisaun organizadora agradese ba partisipante sira hotu, tamba iha vontade hodi partisipa iha atividade orientasaun ne’e ho diak. Hau fiar katak ho oradór prinsipál sira ne’ebé fo palestra sai hanesan koñesimentu ba ita bot sira atu bele aprende iha IPB. Ikus liu ba partisipante sira karik durante hau nia orientadór sira hala’o aktus ruma ne’ebé ofende ba ita bot sira, nu’udar prezidente komisaun organizador husu deskulpa, espera katak ensera atividade buat hirak ne’ebé akontese ona iha loron lima nia laran, ita bot sira haluha ona no hanoin pozitivu hodi hahu ita bot sira nia estudu iha fatin ida ne’e.

Enseramentu ba atividade ne’e partisipa hosi Diretór DNAAEIT (Diresaun Nasional Administrasaun Akadémika no IT) Sr. Pedro Deus, M.Si, Diretor ESE, Sr. Fernando da Costa Fernandes,M.Eng, Diretor ESAZ, Sr. Gaspar F. Vicente,M.Sc, Kordenador kursu ESE no ESAZ, Komisaun Organizadora ho nia ekipa no Dosentes hosi kursu rua (2).

Media IPB : Elisio

Foto : Elisio

Betano, 23 Marsu 2022

Instituto Politékniku Betano (IPB) liu hosi Gabinete Segundu Vise Prezidente IPB – Asuntu Administrasaun no Jestaun Sr. Amancio Horacio ne’ebé reprezenta hosi Magnifíku Prezidente IPB hodi partisipa seminár kona-bá Impaktu Mudansa Klimátika ba Rekursu Be’e iha Munisípiu manufahi no seminár ida ne’e hetan apou fundus másimu hosi WaterAid. Seminár ne’e hala’o iha salaun Quesadhip (RUAK) Novel da Paz Merkadu Antigu.

Objetivu hosi seminár ne’e hodi tau hamutuk hanoin no partilla informasaun ba malu atu halo antisipasaun antes ba akontese situasaun hirak tuir mai ne’e. Tamba ne’e bazeia dadus Nasionál Timor Leste atinji ona porsentu 88% ba komunidade sira asesu ona ba bee no saneamentu atinji ona ba porsentu 61% iha Timor Leste.

Iha munisípiu Manufahi iha tinan 2021, kobertura bee atinji ona ba 83% no saneamentu 100% haktuir deklarasaun area la soe fo’er ot arbiru iha tinan outubru 2019 iha munisípiu Manufahi, atu asegura nia sustentabilidade ba rekursu bee hodi fasilita kmunidade sira atu asesu iha tempu bailoron naruk no tempu udan.

Partisipa iha seminár mak hanesan Segundu Vise Prezidente IPB – Asuntu Administrasaun no Jestaun Sr. Amancio Horacio, Staff DNAAEIT no partisipantes sira hotu.

Mídia IPB : Elisio

Foto : Jernito

Betano, 22 Marsu 2022

Instituto Politékniku Betano (IPB) liu hosi Gabinete Primeiru Vise Prezidente IPB – Asuntu Tékniku Pedagojika no Akadémiku ne’ebé servisu hamutuk ho komisaun organizadora orientasaun akademika tinan 2022 konvida administradór munisípiu Manufahi Arantes Isaac Sarmentu sai hanesan oradór hodi fo palestra ba estudante sira iha orientasaun akadémika IPB. Atividade ne’e hala’o iha resintu IPB.

Materia ne’ebé mak Administradór Munisípiu hato’o kona-bá “Papel Administrasaun Munisípiu iha Polítika Dezentralizasaun tuir dekretu lei Nu. 3 iha Munisípiu Manufahi” ba estudante foun sira hamutuk nai’n 142 tinan akadémiku 2022.

Iha palestra ne’e rasik estudante sira hato’o sira nia preokupasaun liliu kona-bá tarífa transporte públiku Same – Dili folin sa’e no estudante IPB maioria la tuir votasaun iha eleisaun prezidensiál

Hatan ba preokupasaun sira ne’e administradór Munisípiu Manufahi Arantes deklara katak sei halo kordenasaun ho Ministériu Transporte no Telekomunikasaun atu hare ba asuntu ne’e, tamba agora dadaun diresaun mikrolet Holarua-merkadu Same la halo ona operasaun, tamba kombustível folin sa’e no pasajeiru selu ho tarifa tuan la tuir fólin.

Mídia IPB: Elisio

Foto: Elisio

Betano, 22 Marsu 2022

Instituto Politékniku Betano (IPB) liu hosi Gabinete Primeiru Vise Prezidente ba Asuntu Tékniku Pedagojika no Akadémiku servisu hamutuk ho komisaun organizadora orientasaun tinan akadémika 2022 realiza serimónia orientasaun Akadémika ba estudante foun ho tema mak hanesan “Ho Atividade Akadémiku tinan 2022 bele Dezenvolve Koñesimentu Estudante Foun Sira iha Ámbitu Akadémika Nivél Ensinu Superior”. Atividade orientasaun ne’e hala’o iha kampus IPB Betano.

Totál estudante ne’ebé mak partisipa orientasaun hamutuk na’in 160 no total estudante foun hamutuk na’in 142 no estudante tuan hamutuk na’in 18. Hosi Eskola Superior Enjeñaria hamutuk estudante na’in 67 kompostu hosi estudante foun na’in 59 no estudante tuan na’in 8 no Eskola Superior Agronomia i Zootéknika hamutuk na’in 93 kompostu hosi estudante foun na’in 83 no estudante tuan na’in 10.

Sr. Cipriano Tilman, M.PA hanesan Primeiru Vise Prezidente IPB ne’ebé reprezenta hosi Magnífiku Prezidente IPB hodi halao abertura ba atividade orientasaun akadémika ne’e. Nia salienta katak ho laran luak agradese ba estudante foun sira ho laran luak mai iha Institutu ida ne’e hanesan pasu pozitivu ida ba ita bot sira bainhira hotu iha diploma DII maka seidauk bele konsege ho lisensiatura, bainhira loke lisensiatura oportunidade dia’k ba ita bot sira hodi kontinua estudu iha institutu ne’e.

“Husu ba estudante sira labele laran taridu, Institutu IPB hari iha 2017 até ohin loron ita hetan autonomia rasik iha 2021 katak institutu ne’e hamrik mesak no hahu restaurasaun Indepedénsia to’o ohin loron ita nia governu foin maka hari Institutu públiku ida ne’e mesak. Bainhira Institutu ida ne’e kuandu mellora di’ak liután maka foin bele loke tan Turismu no Hotelaria iha Lautem, Enjeñaria iha Covalima, Pescas iha Manatuto no Agriklutura iha Manufahi. Tamba ne’e ba estudante sira labele laran taridu tamba Institutu ne’e iha dosentes Mestradu lubuk ida no lisensiatura hodi didika sira nia an hodi mai hamutuk iha institutu ne’e hodi kapasita alin sira nia koñesimentu para aban bainrua hadia imi nia futuru. Dehan Sr. Cipriano.

Alende ne’e, Diretór DNAAEIT (Diresaun Nasional Administrasaun Akadémika no IT) Sr. Pedro Deus, M.Si hateten katak ho orientasaun ne’e husu ba estudante foun nu’udar faze inisiu hodi hatene kona-bá ambiente IPB hosi estudante foun sira durante orientasaun loron 5 nian. Iha ninia intervensaun katak ba Manufahi oan sira presiza aproveita didiak oportuniadde nu’udar uma nain hatudu prestasaun ho di’ak iha institute ne’e ba estudante seluk ne’ebé hosi Munisipiu 11 no RAEOA no halao knar hanesan estudante tuir tempu ne’ebé termina.

Iha fatin hanesan Prezidente Komisaun organizadora Sr. Aquino aprezenta relatóriu kona-bá preparasaun Orientasaun Akadémika tinan 2022 no orsamentu ba atividade refere ho total montante Dollar Ameikano Rihun Rua Atus Ha’at ($2.400) dolar amerikanu. Nu’udar prezidente komisaun organizadora hakarak hato’o agradese ba membru komisaun sira hotu ne’ebé kontribui maximu hodi prepara atividade orientasaun lao ho di’ak.

Atividade ne’e partisipa hosi Primeiru vise prezidenti IPB, Sr. Cipriano Tilman, M.PA, Segundu vise prezidenti IPB, Amancio Horacio, Diretór DNAAEIT (Diresaun Nasional Administrasaun Akadémika no IT) Sr. Pedro Deus, M.Si, Diretor DNAF Sr. Domingos Faria, Diretor ESE, Sr. Fernando Fernandes, Diretor ESAZ, Sr. Gaspar Vicente, Kordenador kursu ESE no ESAZ, Dosentes no estudante sira.

Mídia IPB : Elisio

Foto : Elisio