Institutu Politékniku Betano hetan vizita espesiál hosi Exelênsia Prezidente Parlamentu Nasional komisaun “G” ho nia distintus deputada sira, hala’o fiskalizasaun iha IPB ba atividade tomak mak hala’o durante ne’e ho estrutura IPB ne’ebé mak lidera husi Magnífiku Prezidente IPB. Sorumutu ida ne’e hala’o iha sala enkontru Gabinete Prezidênsia IPB, loron (30/09/2021).
Objetivu hosi vizita ne’e hodi haree besik no hatene klaru liu ba atividade sira hotu ne’ebé durante ne’e estrutura IPB hala’o, iha duni progresu ka lae? No dezafiu ka obstákulu saida deit mak durante ne’e IPB hasoru.
Dahuluk Exelênsia Prezidente Komisaun “G” relata katak prezensa komisaun mai iha ne’e atu haree no rona hosi estrutura sira mak bele relata mai komisaun saida mak IPB presiza hodi bele hetan apoiu polítiku hosi Umafukun Parlamentu Nasionál, maibé komisaun labele halo desizaun, hanesan reprezentante atu rona informasaun hosi estrutura no departamentu interligadu IPB nian, nune’e bele reforsa iha Umafukun no bele hato’o ba Ministru Ensinu Superiór hodi prepara institutu ida ne’e ba futuru sai nabilan.
“Kna’ar fiskalizasaun” atu hare’e besik-liu ba Eskola Politékniku ida ne’e nia progresu no dezafiu saida deit mak Eskola ida hasoru. Tanba Eskola ida ne’e mak bele prepara ema sai kualifikadu no ikus estudante sira bele kria kampu servisu rasik no bele kompete mos iha merkadória hanesan rejionál nasional no internasional, ho nune’e presiza rona barak liu hosi estrutura sira. Salienta mos katak durante ne’e komisaun nia preokupasaun mak edukasaun, maibé hare’e liliu ba iha Eskola “Tékniku vokasionál” sira no ladun tau atensaun máximu ba iha IPB. Dehan Prezidente Komisaun “G”.
Hatan ba preokupasaun sira ne’e, iha Prezidente IPB nia introdusaun hato’o kona-ba inísiu hari’i institutu hahú husi komisaun instaladora prezensa estudantes, prosesu ensinu aprendizajen hala’o, rekrutamentu ba dosente, funsionáriu no kolokasaun Estrutura tuir organograma mak iha. Hafoion esplikasaun remata, aprezenta mos estrutura IPB nian ba iha Komisaun “G” hodi hatene no ikus fo’o oportunidade ba iha kada divisiaun hodi hato’o progressu servisu, dezáfiu no obstákulu sira mak estrutura sira infrenta hodi bele hato’o sira nia hanoin iha sorumutu ne’e mak hanesan 10 Vise Prezidente, 20 Vise Prezidente, Diretór Eskola Superiór Agronomia no Zootéknika, Diretór Eskola Superiór Enjeñaria, Diretór Nasionál Admin no Finansa, Diretór Nasionál Aprovisionamentu no Koordenadór Kursu Produsaun Animal tuir kna’ar ba atividade sira mak implementa durante ne’e.
Wainhira rona tia esplikasaun husi estrutura tomak, Prezidente Komisaun “G” hato’o nia kongratulasaun ba Estrutura IPB tanba bele halo duni mudansa ba Institutu ida ne’e, kompara ho tinan rua ba kotuk wainhira Komisaun “G” halao nia vizita mai iha IPB. Teni nafatin katak, maské oituan maibé neneik ba bebeik IPB sei sai dezenvolvidu liu tan, wainhira hetan apoiu máximu husi estadu.
Antes remata, Komisaun “G” solusiona mós kona-bá vasina ba eskola sira hotu ne’ebé mak iha, liu-liu ba IPB atu kumpri desizaun Guvernu nian hodi halo sosializasaun ba estudantes, dosentes no funsionáriu sira hotu tenki kompleta ona vasina. Ikus-liu sorumutu remata, estrutura IPB akompaña Prezidente Komisaun “G” ho distintus deputada sira la’o haleu aredores IPB.
Betano, 24 setembru 2021 (IPB)Institutu Politékniku Betano realiza serimónia asina Nota Entendimentu entre Imprensa Nasionál Timor-Leste (INTL) ho Federasaun Desportu Akadémika Timor-Leste (FDA-TL), nomós halo lansamentu ba estrutura Asosiasaun Desportu Akadémika (ADA-IPB) iha sala enkontru kampus IPB.
Iha serimónia ne’e, asina akordu entre IPB no INTL hodi entrega mós dokumentus ofisial refere no fahe informasaun kona-bá produtu hosi INTL. Iha fatin hanesan, kontinua programa lansamentu Asosiasaun Desportu Akadémika entre IPB ho FDA-TL.
Prezidente IPB Sr. Acacio Cardoso Amaral, P.hD iha diskursu relata katak iha lansamentu asina akordu ne’e agradese tebes ba servisu koperasaun nian hodi halo atividade prinsipál rua hanesan asina akordu parséria INTL, lansamentu asosiasaun ADA-IPB no pose ba estrutura ADA-IPB foun. Alende ne’e mos Prezidente esplika kona-bá istória IPB ne’ebé eziste to’o agora.
Sr. Jaime Coreia hanesan prezidente INTL hateten katak agradese tebes ba koperasaun ne’e liu hosi akordu entendimentu entre instituisaun rua, ne’e signifika katak IPB iha hanoin ona hodi salva guarda Orsamentu Jerál Estadu nian, tamba ne’e ba oin koperasaun servisu sai di’ak liu-tán entre instituisaun rua ne’e.
Alende ne’e, iha lansamentu desportivu diriji toma pose hosi Sr. Cipriano Tilman, M.PA nu’udar Prezidente Orgaun Asembleia Jeral ADA-IPB no kontinua fó pose ba estrutura ADA-IPB foun hodi simu kargu ba periodu 2021 to’o 2025.
Iha fatin hanesan Sr. Jacinto de Araújo nu’udar Prezidente Eleitu Orgaun Ezekutivu iha nia diskursu salienta katak ohin loron IPB marka istória foun ida ne’ebé dala-uluk hosi FDA-TL nivél nasionál mai hahu hodi harii ona Asosiasaun Disportivu Akadémiku (ADA-IPB) ne’ebé mak bele hamahan-an iha FDATL.
Liu hosi estabelesimentu estrutura asosiasaun ida ne’e ita sei la hakotu koperasaun ho komponente tomak, katak sei koopera ho intidade hotu no espera katak ho ekipa ida ne’e iha nia mandatu bele hamorin Institutu IPB iha Munisípiu, Rejional, Nasional no Internasional.
Iha sorin seluk Prezidente FDA-TL Sr. Zeferino Tilman, iha nia diskursu akresenta katak agradese ba parte hotu hotu tamba prepara ona fatin no konsege realiza serimónia lansamentu asosiasaun desportu iha Munisípiu Manufahi no Tome Pose ba estrutura ADA-IPB .
Alende ne’e iha mos aprezentasaun kona-bá Lalaok desportu Timor-Leste, Rezultadu alkansadu ADA hamutuk 15 koperasaun sira, Programa fiksu, atividade sira Reitor Cup no seluk tan.
Partisipa iha serimónia refere mak hanesan Presidente Sr. Acacio Cardoso Amaral, Ph.D, Primeiru vise Prezidente Sr. Cipriano Tilman, M.PA, Diretór DNAF Amancio Horacio, Diretór ESAZ Sr. Pedro de Deus, Kordenadór ESAZ no ESE, Dosentes sira, Vise Prezidente INTL ho nia ekipa, Prezidente FDA-TL ho nia ekipa no partisipante sira.
Betanu, 26 Agostu 2021 (IPB-KRXG)Institutu Politékniku Betanu (IPB), nia segundu Vise Prezidente señor Paulo da Silva, M.Eng, simu audiénsia hosi Ekipa Inspetória Komisaun Anti Korupsaun (siglá portugés, CAC) hodi diskuti kona-bá atividade aprendizajén ne’ebé relasiona ho dosente sira, iha sala gabinete presidénsia, kinta(26/08).
Objetivu hosi audiénsia ne’e, hodi diskuti kona-bá prosesu atividade aprendizajén servisu nian bá dosente kontratadu, destakadu no permanente hodi justifíka informasaun ne’ebé ho lolós, nune’e mós bá servisu administrasaun nian hanesan subsídiu akadémika.
Iha konkluzaun ikus katak hosi parte ekipa inspetória CAC agradese ba estrututura IPB ne’ebé fahe ona informasaun ho detallu, liuhosi komunikasaun ne’ebé lós ou lalós, maibé presiza dokumentus mak sai hanesan evidénsia forte ne’ebé ligadu ho asuntu sira ne’e.
Partisipa iha sorumutu refere mak hanesan Diretór DNAF, señor Amancio Horacio, Diretór DNA, señor Marito Soares, Diretor Eskola Superiór Enjeñaria , señor Fernando Fernandes, Diretór Eskola Superiór Agronomia no Zooteknika señor Pedro de Deus no Diretór Ezekutivu CAC ho ninia ekipa tomak.
Dili, 01 Setembru 2021 (IPB-KRXG)Institutu Politékniku Betano nia estrutura partisipa iha aprezentasaun kona-bá Sistema Informasaun Akadémika (SIA) hosi Departementu Enjeñaria Informática, Fakuldade Enjeñaria Siénsia no Teknolójia, Universidade Nasionál Timor Lorosa’e, (DEI-FEST-UNTL) iha resintu kampus Enjeñaria Hera, (01/09).
Iha aprezentasaun ne’e, Ekipa DEI-FEST aprezenta demonstrasaun sistema SIA-FEST mak hanesan, oinsá atu halo sistema jestaun ba servisu Akadémika nian, liu-liu ba dadus informasaun hanesan Funsionáriu, Dosente, Estudante no seluk-seluk tan.
Iha fatin hanesan, hosi parte IPB kongratula ba Ekipa DEI-FEST ne’ebé mak hato’o ona iha aprezentasaun sistema SIA-FEST ne’e, interesante tebes ba IPB atu nune’e hodi implementa sistema refere. IPB nia esperansa ba DEI-FEST nafatin kopera hamutuk hodi apoiu sistema informasaun Dijitál hodi implementa ba IPB nia di’ak i ba futuru.
Partisipa iha aprezentasaun refere mak hanesan Prezidente IPB Acácio Cardoso Amaral, Ph.D, Vise Prezidente Paulo da Silva, M.Eng, Diretór DNAF Amancio Horacio, Diretór DNA Marito Soares, IT IPB, Diretór Vosco Pereira, DEI-FEST ho nia ekipa tomak.
Betano, 17 Setembru 2021 (IPB) – Institutu Politékniku Betano liu hosi Eskola Superiór Enjeñaria, Kursu Konstrusaun Sivil (ESE-KKS) realiza serimónia Judisium ba daruak nian ho totál estudante sira hamutuk na’in tolunulu resin-lima (35) no serimónia ne’e hala’o iha resintu IPB Manufahi, ohin (17/09).
Señor Afraino Marcal G. Freitas hanesan kordenadór Kursu Konstrusaun Sivil hateten katak ohin realiza serimónia judisium hanesan tempu ne’ebé importante tebes ba judisiarius sira, matenek ne’ebé mak ita bo’ot sira hetan iha kursu ne’e tenki hatudu no implementa iha sosiedade sira nia le’et, tamba ne’e nafatin fuan bot no esperansa ba ita bot sira susesu ba oin.
Iha serimónia ne’e, hanesan Primeiru Vise Presidente señor Cipriano Tilman, M.PA ne’ebé reprezenta hosi Magnifíku Prezidente IPB hodi partisipa iha Judisium refere.Alende ne’e, Primeiru Vise Prezidente señor Cipriano Tilman, M.PA iha nia diskursu hateten katak iha momentu ida ne’e, estudante sira kompleta ona prosesu ensinu aprendijazen hodi husik hela knua IPB hodi ba moris ho komunidade sira. Ohin loron ita hare’e judisiarius sira oin midar ida ne’e signifika katak iha momentu ne’e, hamosu mos kontenti balu ba sira nia fuan katak terus ne’e hahu to’o ohin loron realiza duni sira nia mehi.
“Husu nafatin ba judisiarius sira labele kontenti de’it iha ne’e, maibé nafatin buka dalan atu bele kontinua prosesu ba iha futuru hodi kompete. Utiliza koñesimentu ne’ebé mak iha hodi implementa iha imi ida-idak nia munisípiu no neneik ba bebeik ita bo’ot sira nia futuru sei mudansa” Haktuir Primeiru Vise Prezidente.
Iha fatin hanesan, señor Fernando Fernandes, M.Eng hanesan Diretór ESE-KKS salenta katak iha momentu judisium ne’e hanesan etapa ikus ba judisiarius sira, tamba antes to’o iha etapa ne’e hasoru prosesu dezafiu barak no fin judisiarius sira alkansa ona sira nia objetivu durante sira hasoru, alende ne’e mos abertura ba serimónia judisium.
Iha sorin seluk, Reprezentante Judisiariu Frederico de Araújo iha nia diskursu haktenik katak agradese wain ba IPB ne’ebé simu sira hosi inisiu to’o ohin loron sira termina ona judisium, ba ESE-KKS ne’ebé kapasita ona sira iha prosesu aprendizajen tomak no koñesimentu ne’ebé mak sira hetan bele implementa iha komunidade sira.
Partisipa iha serimónia ne’e mak hanesan Primeiru Vise Prezidente Sr. Cipriano Tilman, M. PA, Diretór Eskola Superior Enjenharia Sr. Fernando da Costa Fernandes, M.Eng ho nia Kordenadór Sr. Afranio Marsal Glaudes Freitas, Kordenadór, Sr. Celestinu Gonsalves Tali,MEc.DEv Mali, Korpu Dosentes no partisipante sira.
