Iha Tinan Ne’e, IPB Gradua Tan Finalista Hamutuk Na’in-100
Betano, 25 Agustu 2022
Institutu Politékniku Betano realiza seremónia Graduasaun ba datoluk nian ho tema prinsipál mak hanesan “ Joven Sira Jerasaun Milenial nian Aprende no Esforsu atu hetan Susesu iha Siénsia no Implementa iha Pratika” iha resintu IPB Betano, Same Manufahi, Loron 25 kuarta feira, fulan Agustu tinan 2022.
Ohin loron, Institutu Politékniku Betano marka istória ida tan ba graduasaun datoluk nian ho totál graduadu hamutuk na’in 100. Hosi Eskola Superior Agronómia i Zootéknika, Kursu Produsaun Animal ho totál graduadu hamutuk nai’n 50 no husi Eskola Superior Enjeñaria Kursu Konstrusaun Sivil ho totál graduadu hamutuk nai’n 50.
Magnífiku Prezidente IPB, Doutor Acacio Cardoso Amaral iha nia diskursu hateten katak “iha semana rua nia laran IPB iha eventu boot rua ne’ebé ba loron dahuluk, 18-19 Agustu iha etapa dahuluk ANAAA halo akreditasaun institusional ba IPB no semana ida ne’e IPB marka tan istória ida realiza graduasaun ba datoluk komesa hosi 2017 to’o 2022.
“Hanesan joven milenial ne’ebé moris ho krese iha jerasaun milenial nian dezafiu rasik iha parte ida joven sira moris iha nasaun foun eskola no mos iha institutu foun no buat hotu foun maibé iha parte seluk tenki obriga a’an atu bele hala’o no alkansa objetivu milenial nian nasaun dezenvolvidu sira antes ne’e sira lao uluk ona maibé ita tenki esforsu maske la hanesan ho sira maibé nafatin esforsu atu bele hanesan nasaun dezenvolvidu sira, IPB nia esperansa ba graduadus sira depois gradua hotu imi sempre uja abilidade no matenek ne’ebé iha”, dehan prezidente IPB.
“Hau nia lia menon karik imi hasoru dezafiu tenki barani hasoru lao ba oin nafatin aprende liu tan hodi sai inovador adapta a’an no rejiste dezafiu hotu lembra katak prosesu aprendizajen ne’e naruk tebes no hau espera katak bele atinji duni metas neebe imi iha no no iha rezutadu ne’ebé pozitivu mai IPB”. Haktuir prezidente
Sr. Helio Agustu da Costa Xavier Maukei, hanesan Oratio Sapientia ba Graduasaun Periodu Datoluk, IPB iha nia diskursu salenta katak orgullu no onra tebes tanba hetan fiar mai halo Oratio Sapientia iha Graduasaun datoluk IPB iha tinan 2022.
“Topiku neebé hau sei aprezenta ohin hau tenta liga ho tema geral neebé hatur hosi komisaun organizadora graduasaun datoluk IPB ho kursu rua mak hanesan eskola superior Agronomia e Zooteknika no Eskola Superior Engenharia ho nia tema aprende esforsu no implementa, ba hau pessoal tema nee nia sentidu klean tebes persiza dezenvolve ba iha kontestu ida neebé hau haree mais relevante liu ho situasaun global iha rai laran mak ita bolu seguransa alimentar husi perspetiva setór informal no tópiku nee mos sei iha ligasaun ho tópiku ida kona-bá hau nia peskiza doutoramentu tanba nee iha hau nia aprezentasaun sei koalia barak kona-bá seguransa alimantar husi perspetiva seitór informal iha timor leste”. Dehan Sr. Helio
Ohin loron graduasaun bele konsidera jerasaun milenial iha timor leste. Papel eskola superior rua iha IPB nia kontribuisaun liu-liu iha siguransa alimentasaun importante tebes pratikamente eskola superior agronomia i zooteknika produz aihan alimentasaun no eskola superior engenharia hamosu invensaun teknologia hodi utiliza ba produsaun alimentar relasaun teknologia mekanizasaun ida hodi kontribui ba siguransa alimentar iha timor leste”. Hatutan Oratio Sapientia
Iha fatin hanesan Ministru Ensinu Superior, Siénsia no Kultura (MESSK) Dr. Longuinos dos Santos iha nia intervensaun hateten katak ne’e hanesan onra ida ba Ministro MESSK hodi partisipa iha seremonia graduasaun ba datoluk nian iha IPB.
“Seremónia graduasaun representa momentu importante ba ita nia rai tanba IPB sai nudar instituisaun uniku ida hosi ensino superior públiku ne’ebé kursu politeknika nian no iha area nee oferese kursu sira ba area profesionalisante ho objetivu prinsipal atu transmite ba formando sira nia kompetensia ho liafuan sira ne’ebé eziste ona, karakteristika hanesan baze ba fundamental hodi tau ekilibriu ba sistema nasinalisius superior nian alende kursu sira iha nivel universidade ita nia nasaun persiza iha instituisaun neebé oferese formasaun diak hodi prepara estudante ho kompetensia hodi fo garantia bot ba taxa empregabilidade”.
Nune’e ministru MESSK hatutan katak iha tempu badak sei hahu konstrusaun ba primeira pedra IPB nian ne’ebé ADN halo ona avaliasaun no hetan ona meritu kompañia iha tempu badak, MESSK sei halo asina kontratu ho manan na’in kompañia no hare’e ekipa hosi minisériu sei desloka ona mai iha Betano atu bele koordena ho direjentes hotu iha IPB no administrasaun munisipiu Manufahi inkluIi seguransa hodi halo preparasaun ba konstrusaun IPB iha tempo badak nee hanesan marka istoria ida iha IPB
Partisipa iha serimónia graduasaun mak hanesan Ministro do Ensino Superior Siensia no Kultura, Dr. Longuinos dos Santos, Sekretario Estado SEEFOPE Sr. Alarico Pereira, Prezidente Komisaun G. parlamento Nasional Sr. Antonio Verdial, Prezidente Komisaun Funsaun Publiku Dr. Faustino Cardoso, Prezidente Conselho Geral ho nia membru tomak, Reprezentante Ministru Telekomunikasaun, Reprezentante Embaixador Indonesia, Reprezentante Magnifiku Reitor UNTL, Prezidente INCT, Ekipa hosi Fakuldade Engenharia, Administrador Munisipiu Manufahi, Diretor Ezekutivu ANAAA, Diretor Agensia Dezenvolvimento Nasional, Diretor Agro-Pecuaria, Inspetur Sentru Formasaun Tibar, Diretor Geral Finansa MESSK, Diretor Geral Gab UNTL, Diretor Nasional Pecuaria, Diretor Laboratoriu Nasional Obras Publika, Diretor Institutu Bambu Tibar, Diretor Munisipal sira, Formador Akademia Polisia, Komandante FFDTL Naval Betano, Prezidente Konselho Veterano Munisipiu Manufahi, xefe suku Betano no Estrutura, Reprezentante Kultura no Lia nain, Diretor Kompania Lokal no Nasional Reprezentante Madre Komunidade Betano, Estrutura IPB, Korpus Dosente, Funsionariu Administrasaun IPB, Enkarekadu edukasaun sira, Inan Aman no graduados sIPB.
Mídia IPB
