IPB Asina MOU Ho Sentru Formasaun Polísia Akadémika (CFPA)

Betano, 26 Abril 2022

Institutu Politékniku Betanu nia Magnífiku Prezidente IPB Sr. Acacio Cardoso Amaral, Ph.D asina MoU ho Sentru Formasaun Polísia Akadémika (Siglá Portugéz, CFPA-Comoro), Komandante Superintendente Xefe Polísia Sr. Cand. Arquimino Ramos kona-bá formasaun ba dosentes sira. Serimónia asinatura akordu ne’e hala’o iha salaun Polísia akadémika – comoro.

Objetivu hosi akordu ne’e, atu garante servisu koperasaun entre IPB ho CFPA hanesan parte ida atu estabelese koperasaun iha area edukasaun no treinamentu, liuhosi formasaun ida ne’e hodi hasa’e koñesimentu liliu iha formasaun ba dosentes sira.

Magnífiku Prezidente IPB Acácio Cardoso Amaral, Ph.D iha nia diskursu hateten katak ohin loron, spesiál tebes ba IPB ne’ebé mak estabelese koperasaun ho sentru formasaun polísia akadémika (CFPA) atu fornese formasaun pedagójika ho sertifikadu nivél IV iha edukasaun, formasaun no avaliasaun ba dosente sira nomos funsaun hosi IPB mak fornese formasaun ba membru PNTL ne’ebé relevante baseia pedidu ne’ebé propoin hosi dirijente CFP nian. Alende ne’e mós Prezidente IPB kontínua esplika istoria no rezistensia IPB ba Komandante Polísia Akadémika ho nia membru sira.

”Memorandu ida ne’e ita asina ohin, karik durante nia andamentu mak la’o ladun di’ak, ita hadia iha futuru no ami espera katak kooperasaun ne’e sei kontinua nafatin ba oin”, Dehan Prezidente

Iha sorin seluk, Prezidente IPB hateten ba membru PNTL sira katak tinan tinan bazeia ba prosesu engresu estudante foun, PNTL ho F-FDTL iha previléjiu atu goja iha rejime spesiál ba atu rejista no kontinua estudu iha UNTL no IPB no to’o agora seidauk iha membru  PNTL no F-FDTL  aproveita kanál ne’e atu kontinua estudo iha IPB ho akordu ne’e ida sei karik iha kandidatu balu interese ba IPB.

Iha fatin hanesan Sr. Cand. Arquimino Ramos, S, B.Bus, MM salienta katak agradese tebes ba IPB, tamba agora dadaun halo tán kooperasaun ho ami, objetivu hosi akordu ne’e hanesan previléjiu bot ba ami. Liuhosi kooperasaun ne’e hodi hametin relasaun servisu entre IPB ho CFPA ne’ebé mak relevante liu-bá iha formasaun dosente sira iha aréa ne’ebé presiza atu apoiu formasaun.

Partisipa iha asina MoU ne’e hanesan Primeiru Vise Prezidente Sr. Cipriano Tilman, M.PA, Segundu Vise Prezidente IPB, Sr. Amancio Horacio, Diretór Nasionál Aprovizionamentu Sr. Marito Soares, Diretór Nasionál Administrasaun Akadémika no IT (DNAAEIT), Sr. Pedro de Deus, M.Si, Diretor Eskola Superior Agronomia e Zootéknika (ESAZ), Sr. Gaspar Vicente Ferreira, M.Sc, Diretór Eskola Superior Enjeñaria(ESE), Sr. Fernando Fernandes, M.Eng, Sr. Komandante komponente formasaun i treinu, Coronel Haksolok, Amu Kapelaun PNTL, membru PNTL no membru F-FDTL.

MédiaIPB: Elisio

Foto: Elisio