IPB Hala’o Enkontru Ho Ekipa ANAAA Kona-Bá Avaliasaun No Akreditasaun Institusional IPB
Betano, 23 Fevereiru 2022
Institutu Politékniku Betanu liu hosi Magnífiku Prezidente IPB, Sr. Acacio Cardoso Amaral, P.hD ho estrutura sira hala’o enkontru ho Diretór Ezekutivu Ajénsia Nasional ba Avaliasaun no Akreditasaun Akadémika (ANAAA) Sr. Edmundo Viegas, P.hD ho nia ekipa hodi koalia kona-bá IPB ninia preparasaun ba avaliasaun no akreditasaun institusional. Enkontru ne’e hala’o iha salaun gabinete prezidente IPB iha loron kuarta 23/02/2022 hosi oras 14:00 – 16:30 0tl.
Objetivu hosi enkontru ne’e hodi hatene progressu IPB nia preparasaun dokumentus ba avaliasuan akreditasaun to’o iha ne’ebé no IPB rasik mós presiza rona informasaun hosi ekipa ANAAA ba preparasaun dokumentus refere.
Magnífiku Prezidente IPB, Sr. Acacio Cardoso Amaral, Ph.D hateten katak ho prezensa ekipa ANAAA atu bele responde ba tékniku IPB sira ne’ebé durante ne’e elabora no prepara hela dokumentus avaliasaun IPB nian ba akreditasaun hosi ANAAA. Tamba ne’e ho prezensa Diretór Ezekutivu ANAAA ho ekipa bele fo resposta diák ba IPB hodi hato’o aprezentasaun oinsa prepara dokumentus akreditasaun IPB nian ba ekipa ANAAA.
Alende ne’e Diretór Ezekutivu ANAAA Sr. Edmundo Viegas, Ph.D iha nia esplikasaun katak akreditasaun Instituisionál IPB hanesan primeira vez, nune’e ita bo’ot sira esforsu maximu atu prenxe relatoriu ho diak, tamba ida ne’e mak sai hanesan referensia ba avaliador sira. Manuál ne’ebé mak ANAAA uza ne’e mak manuál uza ona iha tinan 2017-2018. Manual ida ne’e nu’udar nudar output hosi koperasaun entre Ministériu Edukasaun ho Banku Mundiál. To’o agora ANAAA sei mantein nafatin manual ida ne’e nomós mantein pezu ne’ebé hatur iha kada standar ualu (8)
Entertantu iha aprezentasaun hosi Ekipa tékniku IPB aprezenta mós preparasaun ba avaliasaun hanesan dokumentus hosi manual no elektróniku ne’ebé IPB prepara ona no ekipa hosi ANAAA aprezenta mós lalaok oinsá prepara dokumentus no prenxe tuir rekezitus hosi ANAAA rasik.
Enkontru ne’e partisipa hosi estrutura IPB mak hanesan Prezidente IPB Sr. Acacio Cardoso Amaral, Ph.D, Primeiru Vise Prezidente Sr. Cipriano Tilman, M.PA, Segundu Vise Prezidente Sr. Amáncio Horácio, Diretór Nasional Administrasaun Akadémiku Estudantil.IT(DNAAE.IT) Sr. Pedro de Deus, Diretór Eskola Superior Agronomia i Zootéknika (ESAZ) Sr. Gaspar Ferreira Vicente no Diretór Eskola Superior Enjenaria (ESE) Sr. Fernando da Costa Fernandes no tékniku sira hosi DNAAEIT – IPB no ekipa hosi ANAAA mak Diretór Ezekutivu Sr. Edmundo Viegas, P.hD ho nia Ekipa.
Mídia IPB
