PREZIDENTE IPB OFISIÁLMENTE ABERTURA ORIENTASAUN AKADÉMIKA IHA TINAN 2021

Betano, 19 Fevereiro 2021 (IPB) – Ohin loron, Institutu Politékniku Betano hala’o orientasaun akadémika ba estudante foun sira iha tinan ne’e, ho tema “Liuhosi Orientasaun Mak Oinsá Atu Tane A’as Prinsipiu Igualdade, Liberdade, Edukativu no Umanizmu”, ne’ebé ofisialmente abertura ba orientasaun hosi Magnífiku Prezidentie IPB Acácio Cardoso Amaral, Ph.D, iha resintu kampus IPB. (sexta, 19/02).

Objetivu hosi orientasaun ne’e, iha pilár importante tolu mak hanesan promove estudante foun sira no koñesimentu sistema akadémika IPB nian, atu orienta estudante foun hosi ambiente estudu konvensional ba estudu kreativu, inovativu, kompetativu no iha espiritu nasionalismu patriotismu hodi hola parte dezenvolvimentu nian.

Entretantu abertura ba orientasaun ne’e, Magnífiku Prezidente IPB Acácio Cardoso Amaral, Ph.D iha nia diskursu salienta katak fó apresiasaun parabéns ba estudante foun sira ne’ebé mak ultrapasa mai iha IPB hodi kontinua sira nia estudu hodi hasoru ambiente foun iha institutu refere.

Iha parte seluk prezidente mós hato’o parabéns ba prezidente komisaun no ninia ekipa tomak hodi organiza atividade orientasaun iha tinan ida ne’e.

Prezidente Komisaun Organizadora José Mendes deklara katak relasiona ho orientasaun ne’e nu’udar atividade obrigatóriu ida no hakerek ona regulamentu orientasaun IPB nian. Durante ne’e ekipa hala’o preparasaun servisu komisaun organizadora nian ne’ebé nomeia sai hanesan komisaun refere iha tinan ne’e hodi simu kna’ar no responsabilidade tomak hodi bele fasillita ba atividade hotu iha institutu ne’e rasik.

Hosi orientasaun ne’e, totál estudante foun hamutuk na’in-126 no ba estudante tuan na’in-6 no totál hamutuk estudante na’in-132.

Ikus liu agradese ba parte hotu-hotu no liuliu Sivitas Akadémika IPB.Partisipa iha orientasaun ne’e, Magnífiku Prezidentie IPB Acácio Cardoso Amaral Ph.D, Vise Presidenti I Cipriano Tilman, MPA, Diretór Eskola Superior Enjeñaria, Diretór Agronomia no Zootéknika, Koordenadór Produsaun Animal, Kordenadór Konstrusaun Sivil, reprezentante hosi administradór Munisípiu Manufahi nian, Prezidente Asosiasaun Estudantíl no estudante sira hotu.

Mídia IPB